Shillong, Jylliew 12: Khnang ban lap ia ka jingdon jong u khñiang jingpang HIV/AIDS ha ki longkmie kiba armet, ka Maternal & Child Health Hospital (MCH), Jowai bad ka Meghalaya Aids Control Society, Shillong ha ka sngi Baar ka la plie paidbah ia ka Integrated Counselling Testing Centre (ICTC) ha MCH Hospital, Jowai.
Ha kane ka sngi, la sakhi lang da u Superintendent jong ka MCH Jowai Dr. E. War, ka Project Director jong ka MACS ka Dr. B. Decruse, u Incharge DM&HO West Jaintia Hills District Dr. K Dhar nalor kiwei kiwei.
Ka Dr. B. Decruse ha ka jingkren lamkhmat, ka la iathuh ba ka Integrated Counselling Testing Centre (ICTC) ka dei ka jaka ban pynlong ia ka jingiasyllok bad ki briew na ka bynta ban batai halor u khñiang jingpang HIV bad ia ka jingdonkam ban leh tes ia ka snam khnang ban tip la ki don ne kim don ia u khniang jingpang HIV katkum ka mon sngewbha ka jong ki bad ka pynthikna ba ia ka kaiphod jong ka jingleh tes snam yn tip tang u nongpang bad u doktor uba u sumar sukher ia ki.
Ka jingleh test ha kane ka ICTC ha MCH Hospital, Jowai kan sdang naduh ka jingleh ia ka Medical Checkup tad haduh ban da kha ia ki khunlung bad lada lap ba ki don ia u khniang jingpang yn sdang noh mardor ia ka jingsumar khnang ba u khniang un ym hiar sha ki khunlung katba ki dang don hakpoh ka kmie.
