Shillong, Risaw 06: Ka KSU Information Cell lyngba ka sur ki samla pule ka NEIAH ha u kyrwoh ka la buh ka jingkylli ba hato ka long kaba biang ba ki samla pule kin shu pule thik tang ïa ki kot ba lah bthah ïa ki ban pule, ban ïoh ïa ka kyrdan pule, ban ïohkam ïohjam bad ban shu khaprip ngaiñ bad set sbak ïa la ka shyntur bad ki skhor haba ïadei bad kiei kiei kiba wanrah ïa ka jingsniew ha ka imlang sahlang bad ka jaidbynriew.
Ha kaba ïadei bad kane ka 5 tarik u Risaw 2024 kan dei ka sngi sah kynmaw ha kaba ka KSU ka la ïoh ban pynkha ïa la ka tnad treikam ha ka skulbah North East Institute of Ayurveda and Homeopathy. Ïa kane ka tnad treikam kaba la tip kum ka KSU NEIAH Unit la pynskhem bad pyntian smai da u Samla Donald V Thabah, General Secretary ka KSU Central Executive Council.
Ha kane ka lympung pynskhem ïa ka KSU NEIAH Unit, la pynïaid da u samla Raymond Kharjana (Organising Secretary KSU CEC), bad la sakhilang da ki nongïalam shnong ba kynthup ïa u samla Rinelson Suting, Assistant Secretary, Dorbar Shnong Mawkasiang, Samla Wankit Nongkhlaw, Assistant Secretary, Dorbar Dong Mawdiangdiang, Samla Celestine Rynghang, GS KSU Mawkasiang Unit cum member anti-ragging cell, NEIAH, Shelkitbok Kharbani, Assistant Education Secretary, KSU CEC, Sonstar Nongkhlaw President, KSU Shillong Mihngi Circle, Advocate Hamarbabiang Wanshong member, Legal Affairs Cell, KSU, Sambormi Lyngdoh President KSU Laitumkhrah Unit, Jimmy Nongdhar President KSU Mawkasiang Unit bad kiwei kiwei.
La pynskhem ïa ki dkhot ka KSU NEIAH Unit ha ïing shnong ka Mawdiangdiang ba la ïoh ki jingkren na ki nongïalam ka KSU kiba la kren ha kiba bun ki phang kumno ban ïada bad kyntiew ïa la jaitbynriew ha kino kino ki phang kiba donkam.
Ka KSU ka ngeit skhem ba lyngba ka KSU NEIAH Unit lem bad ka jingkyrshan ka KSU hi baroh kawei yn pynskhem ïa ka jinglong trai ki samla pule Khasi ha kane ka skul bah bad kumjuh ruh ban peit pyrman ba ki Khasi ba pule bad trei ha kane ka skulbah kin ym shah ban beiñ bad shah leh shilliang ha kane ka skulbah ba la seng ha ka Ri Khasi, ong ka kyrwoh khubor na ka Information and Publicity Cell KSU.
