Shillong, K’lyngkot, 23: Ka jylla Meghalaya mynta ka sngi ka la rakhe ïa ka jinglong tynrai ha ka jingïalang ‘One District One Product’ (ODOP) Sampark bad la pynkup burom ïa ki nongjop na ka jylla ha ka jingïalang ODOP Sampark kaba la long ha Mumbai.
Ka Invest India, ha ka jingïatreilang bad ka Tnat ka rep ka riang, Sorkar Meghalaya ka la pynlong ïa ka prokram ODOP Sampark ha nongbah Shillong. Ha ka jingïalang la pyni bad kyntiew ïa ki tiar na ka thaiñ, kaba la noh synniang sha ka jingkiew ka ïoh ka kot bad ka jingriewspah ka deiriti jong ka thaiñ.
Ka Myntri ba dei khmih ïa ki kam rep jong ka jylla Meghalaya, Dr. Mazel Ampareen Lyngdoh ka la batai shaphang ki kam Aatmanirbhar Bharat jong ka jylla. Ka la ai jingïaroh ïa baroh kiba don bynta ha ka kam ODOP kiba la ïoh jingithuh lyntba ki khusnam ODOP, bad ka la kdew sha ka bynta kaba heh jong ka jingïalam lynti ïa ki nongseng kam ha ki kam ai jingpyntip kiba wanrah ïa ki khubor kiba ïadei bad ki jingjop jong ki nongrep na ki jaka ba kyndong tam. Ha ka jingkren shaphang ka jingïatreilang hapdeng ka Sorkar Pdeng bad ka Sorkar Jylla, ka la ong ba kane ka la kyntiew ïa ki lad ki lynti ïa ki nongrep bad ki ophisar na ka bynta ka jingbei tyngka.
Ka ODOP Sampark ka ai ka rynsan ban pyni ïa ki bynta bapher bapher jong ka Meghalaya bad ki jinglong kyrpang jong ki distrik. Dang shen, ka Meghalaya ka la jop ïa ka takma rnong ha ka thup ki Jylla (B) ha ka National ODOP Awards kaba la pynlong ha ka Bharat Mandapam ha ka 3 tarik u Kyllalyngkot 2024.
U Vice President ka Invest India, Dr.Preet Deep Singh u la ban jur halor ka jingkhlaiñ ka India ha kaba ïadei bad u shynrai kaba wan na ka jingbun curcumin. U la batai ruh shaphang ka sienjam ODOP jong ka Sorkar Pdeng bad ka jingjop jong u Shynrai Lakadong. U la ong ba u shynrai Lakadong na Meghalaya u long ka dak jong ka jingjop ha kaba la ïoh jingïaroh ha Davos namar ka jingïaid iew ha Europe. Gati Shakti ka dang pynbeit ïa ki jingeh logistic ha ka jingdon jingem ha ka kam shalan mar. Ka bynta kaba kongsan ban wanrah ïa ka jingsngew sarong ka dei ka jingbteng ïa ki sienjam ban pynbha shuh shuh ïa ki mar, u la ong
U Bah Maqbool Lyngdoh Suiam, ODOP- State Nodal Officer u la don lang ha kane ka sngi. U la ai ka jingkren pdiang sngewbha bad u la jubab ïa ki jingkylli ba la wanrah da ki nongïashim bynta.
Ki nongrep bad ki nongseng kam lajong ha ki kam rep ki la batai shaphang ki jingjop jong ki ha kane ka sngi. Ki la kren shaphang ka jingkyrshan jong ka Sorkar Jylla lyngba ka Mission Lakadong, Mission Jackfruit bad PRIME program, khnang ban pynryntih ïa ka jingbha jong ki mar bad ban pynpoi sha ki iew hapoh bad shabar ri.
Ka Kong Padma Trinity Saioo, na West Jaiñtia Hills distrik ka la batai shaphang ka jingïaid lynti jong ka ha ka kam rep shynrai Lakadong ha ka jingkyrshan jong ka Spices Board of India. Mynta ka pynbiang shynrai Lakadong sha palat 15 tylli ki jylla ha ka ri. U Perastil Sangma na South Garo Hills distrik u la ieh noh ïa ka kam sorkar jong u ban sdang ïa ka kam lajong kaba ïadei bad u sohphan. Mynta u die ïa ki mar ba shna na u sohphan na ki dukan bapher bapher ha kylleng ka jylla.
Kumjuh ruh, u Bah Sunny Malngiang na East Khasi Hills distrik u la kren shaphang u sohniamtra (Khasi Mandarin) ba la ïoh GI tag, ba ïaid iew bha ha ki nongbah kum ka Bangalore ha kaba la pynlong dang shen ïa ka Khasi Mandarin. Ka Citrus rejuvenation program jong ka tnat kam rep ka la kyntiew ïa ka jingrep. Shuh shuh ka jingshalan ïa u sohniamtra sha Middle East ka la ai mynsiem bha ïa ki nongrep ba kin rep kham bun ïa une u soh.
U Lotsing Sangma na East Garo Hills distrik u la kren shaphang ka jingkyrshan jong ka Sorkar kaba la plie lad ïa u ban pynïar ïa ki kam jong u kiba ïadei bad u sohtrun ha kaba u la kham ïohnong. U Bah Precious Tmung na Ri Bhoi distrik u la pyni ïa ki jaiñ eri silk hapoh ka brand ‘Zong hi’ bad u la ïathuh shaphang ka jingïaid lynti jong u ban pyntylli bad pynkhlaiñ ïa ki nongthaiñ jaiñ ban khyllie im biang ïa ki jaiñ tynrai ba ju phong da ki briew ka jylla Meghalaya.
Ha kaba ïadei bad ka jingkyntiew ïa ki mar ka Meghalaya, ka jingsaiñdur bad ka jinghiar pateng ka deiriti, ka Sorkar Jylla, ha ka jingïatreilang bad ka Invest India, ka dang pyrshang ban seng ïa ka iew na ka bynta ki nongsaiñdur, ka Unity ne Ekta Mall. La thmu ba kane kan long ka jaka pdeng ïa ki briew ba kin ïohi ïa ka jinglong tynrai jong ka Meghalaya.
Ka jingïalang mynta ka sngi ka la plie ka lad ba kyrpang ïa baroh kiba ïadon bynta ha kine ki kam da kaba kynthup lang ïa ki ophisar Sorkar, ki nongdie ODOP bad kito kiba ïadon bynta lang, ki ophisar kiba ïadei bad ki lad pathai khubor. Ka la wanrah ïa ka jingïamir jingmut shaphang ki jingeh bad ki lad kiba don hakhmat ki jaka pynmih mar ha kaba la plie lad ïa ka jingïatreilang bad ka jingnoh synniang na ka bynta ka roi ka par.
Kito kiba wan ïashim bynta ki la ïoh lad ban ïohi ïa ka jingïar ki mar kiba na Meghalaya ha ka jingpyni ïa kine ki mar ba shna ha ka jylla.
Da kaba phaikhmat bad kyntiew kawei ka mar na kawei ka distrik, kane ka sienjam ka wanrah ïa ka jingkiew ka imlang sahlang bad ka ïoh ka kot ha ki thaiñ ha kaba la pyni ïa ki cluster ba kyrpang bad ki jaitbynriew kiba la tei ïa la ka jinglong kaba kyrpang.
