Shillong, K’lyngkot, 23: Haba peit ia ki kyntien ba kren u Rahul Gandhi ki dap da ki jingshukor jing pynbeij, ka BJP Meghalaya Pradesh ka kob ia u nongialam ka congress ia ki jingkren jong u lada u buh nongrim watla tang shiteng ia ki jingialap jong u ha ka jingialang paidbah ha Nongpoh.
“Ngi kylli ia u Rahul Gandhi ban pynshai ha kano ka dur ba ka jinglong, ka histori, ka rukom im rukom sah ki nong Meghalaya ka shah thombor, ka BJP ka la ban pynshai ia ki kam kaba ka la leh naduh tynrai ha ki rukom bapher bapher lyngba ki Morchas ka party kumno kan lah ban iarap ia ka imlang ka sahlang bad ban kiew ki paid meghalaya, ym dei ba ngi kawang ktieh ia ka party congress kaba lah synshar ia ka ri jong ngi kum ba 40 snem eiei , ka BJP ka kdew ruh ruh ba ki nongkitkam jong ka party ka bun hapdeng ki trai muluk ka ri, ha ki distrik bapher bapher na sor shaduh nongkyndong ki dang kiew katba dang mih ki sngi. Ka jingkylli ka long lada ngi kum ka party BJP lada ngi pynjlor ia ki rukom im rukom sah ki paid meghalaya kumno ki paidbah naduh na sor bad na sha kyndong ka jylla meghalaya ki wan iasnoh lang bad ka party jong ngi, la kylli ka BJP ha u kyrwoh ba la phah sha ki lad pathai khubor ha ka sngi Baar.
“Lada ngi leh sniew ki nongkitkam jong ngi ki ym kiew manla ka sngi ym ki nongkitkam ka congress kiba dang duh jait,” la ong ka BJP.
Ka BJP ban shu pynkynmaw ruh ia u Rahul Gandhi ba ki riew shlur jong ka jylla meghalaya ki ioh ia ka jingpynkup burom bad ka jingkynmaw na ki paidbah, ban shu kren noh ngim kynmaw ba ka congress ka ju leh kumta.
“U Rahul Gandhi u la kren ba ka ktien Khasi bad Garo kam don ha ka Eighth Schedule tangba u klet pat ia ki nong Jaintia, tang hangne u la pynshai ba um pat tip bha shaphang ka tynrai ki paidbah Meghalaya, um don jingtip jingithuh ia ki paidbah bad ka jinglong jong ka ri hi baroh kawei,” la kynthoh ka BJP.
“Ka BJP ka kwah ruh ban tip bad ban kylli la ka Songress ka lah leh aiu ha ki 60 snem ba ladep ha ka por ba ki dang don ha ka bor synshar ha ka ri india baroh kawei bad ha ki shnong ki thaw bad balei u Rahul um pynmih ia kita ki kyntien ha ka por ba u dang don ha ka bor, hynrei tang ki jingkylli bym don nongrim,” la buh jingkylli ka BJP ia ka Congress.
“Ha ka por ba kren shaphang ka Manipur u Rahul u pynsngew kumba ka jingiakhih ka Manipur ka dei naduh ba synshar ka BJP, hynrei u klet ba ka iing ka sem jong u kam pat tip ne wan bha shane sha thaiñ shatei lammihngi ne shim kabu ban iarap. Ngi kiba dei ki trai ri ngi tip bha ba ka Congress ka khlem wad lad ban pynbha ne pyniasuk ia ka jingiadei ha kane ka thaiñ. Ha kato ka por ngim dei ban klet ba ka Congress ka don ha ka bor ha ka ri bad ha Manipur hynrei lehnohei ba kam don ka jingiarap na ka seng ba synshar ha kato ka por, phi lah klet ia kata Rahul Gandhi? la kylli biang ka BJP.
“Mynta lada ka BJP ka wanrah ki lad jingsuk bad ban pynjem ia ka jingjia ha Manipur u Rahul Gandhi u wan ai ding pynban tangba kine ki dei ki rukom trei ka Congress naduh mynshuwa,” la sangah ka BJP.
“Tang ban shu pynkynmaw ia u Rahul Gandhi ka jingleh donbor dei ka polisi jong ka congress bad ki nong pyniaid ba hiar pateng kumjuh. Ka BJP ka ngeit skhem ba ka jingiatrei bad ka jingiadei jong ka Sorkar Pdeng bad ka Sorkar Jylla kumjuh ka lah wanrah ha ki rukom treikam bapher bapher ha ka thain Shatei Lammihngi hi baroh ka wei. Rahul Gandhi, ka ladei ka por ba phin sa ngeh noh ia ka Bharat Todo Unyay Yatra jong phi! kynthoh ka BJP.
