Shillong, Nailur, 01: Ka Managing Committee jong ka Soso Tham Memorial Secondary School ryngkat bad ki nongïalam jong ka Khasi Students’ Union (KSU) ha ka sngi U Blei ki la buh ïa u mawnongrim ban tei sa shi mala ïa ka Soso Tham Memorial Secondary School lyngba ka CSR project ba la bei jingpisa da ka DIAGEO.
Ïa kane ka skul ba la shna kyrpang da ka KSU, la plie ha ka 18 tarik, Nohprah, 2020 ha ka shnong Lawsohtun, Block – VI bad ka don mynta naduh Class VIII haduh Class-X.
Ïa kane ka skul la shna kyrpang da ka Khasi Students’ Union (KSU) Laban Circle na bynta ki khynnah shynrang bad ki khynnah kynthei kiba wan na ki longiing baduna ka ïoh ka kot bad ki ba la ieh noh shiteng por ïa ki jingpule ki jong ki na ki daw bapher bapher. Kane ka skul ka ai jingpule ei ïa ki khynnah khlem shim pisa
Ha kane ka skul, ki khynnah pule ki don haduh 40 ngut kiba jingpule ei.
Ka Managing Committee bad ka KSU ki don jingthmu ban tei sa shi mala ïa kane ka skul khnang na ka bynta ban kyntiew kyrdan sha ka Higher Secondary School ban ai jinghikai ha ka Class-XI bad Xlass-XII.
Ha ka jingbuh ïa u mawnongrim, la sakhi lang da Cluster Head jong ka North East, Diageo ka Mrs. Sumitra Panthi, u Public Policy Lead jong ka Diageo u Mr. Surajit Dutta bad na ka Managing Committee jong ka skul la lam khmat da u Chairman u Bah Daniel Khyriem, u Secretary u Bah Airpeace Rani, u Education Secretary jong ka KSU u samla Pynkmenlang Sanmiet, u Asst. Secretary jong ka KSU Seng Kmie u samla Reuben Najiar uba long ruh ha kajuh ka por u President jong ka KSU Laban Circle, u Finance Secretary jong ka KSU u Manly Nongpluh lem bad kiwei kiwei de ki nongkitkam ka KSU.
Nalor kine, la sakhi lang ruh da u Rangbah Shnong jong ka Lawsohtun u Bah Harribert Rynjah, ki dkhot na ki Dorbar Shnong, ki dkhot ka KSU Laban Circle, ki nonghikai bad ki khynnah kiba pule ha Soso Tham Memorial Secondary School.
