Shillong, Naiwieng, 16: U Myntri Rangbah ka Jylla u Conrad K Sangma u la ïathuh ba ka Sorkar Jylla ka dang bishar na baroh ki liang halor ka jingdawa ban pynlong ïa ka ktien Khasi bad Garo kum ki Official Languages jong ka jylla Meghalaya.
“Ngi hap ban bishar na baroh ki liang bad ngin sa shim ïa ka rai,” la ong u Sangma ha ka jingïakren bad ki lad pathai khubor.
“Ha ki por mynshwa kine kijuh ki ishu ban pynbna kum ka Official Language ka shong ha rukom batai kaei ka jingmut jong ka kyntien Official Language. Namarkata, ïa kine ki bynta baroh yn dang hap ban bishar,” u la ong.
Da kaba pynpaw ba ki don ki jingeh, u Myntri Rangbah u la ong, “lashai, lada ka jingthoh ha ka dulir sorkar yn thoh ha ka ktien Garo kata kan pynmih ïa ka jingeh ne kan ym pynmih jingeh, kumno ngin leh ïa kata.”
“Lada mano mano ki thoh ha ka ktien Garo ki briew kiba kren Khasi bad Phareng kin ym lah satia ban sngewthuh ne ban ai ki jingkynthoh bad ngin sa ïakynduh jingeh wat ha ka jingpynïaid ïa ka synshar ka khadar. Lada kita ki bynta yn hap ban kynthup, lada la long ïa ka Official Language kumno ngin ïaid shakhmat ban weng ïa kine ki jingeh lane lada ngi weng ïa kata, bad ka dulir sorkar bad ki jingthoh ha ki bui kim dei ban long ha ka ktien Khasi ne Garo, hato kata kan dang don jingmut ïa ka kyntien Official.”
“Ngi la peit ïa kine ki bynta baroh bad ngin sa lah ban rai kumno ban ïaid shakhmat bad kane namarba kum ka Sorkar bad kum u Myntri Rangbah ka Jylla khlempep ngin jin da la kwah palat ban kynthup kum ka Official Language ïa ka ktien Khasi bad Garo hynrei kaei kata ka jingmut bad kumno ngin leh ïa ki jingeh ki ban mih bad lada ki jingthoh ki wan ha ka ktien Khasi bad Garo kumno ki ophisar ki leh ïa kata bad kaei ka ban jia ïa ka synshar ka khadar,” u la bynrap.
