Shillong, Naiwieng, 16: Ka Sorkar Jylla ha ka sngi Palei ka la rai ban thaw da ka Meghalaya Education Recruitment Board (MERB) ban pyndap ïa ki kam kiba thylli hapoh ka tnat Pule Puthi hapoh por lai bnai haduh hynriew bnai.
U Myntri Rangbah ka Jylla Conrad Kongkal Sangma uba la kren sha ki lad pathai khubor hadien ba la wai ka jingïalang Kynhun Myntri u la ong, “ngi la rai ban thaw ïa ka permanent MERB.”
“Ki don mynta kumba 187 tylli ki kam kiba lait ha ka tnat Pule Puthi khamtam ha ka Higher and Technical Education, wat ha ka Secondary bad Higher Secondary bad ha kiwei kiwei ki kyrdan. Ki don katto katne ki bynta ba ka kam ka shu sah thylli la palat 3-4 snem bad namarkata ngi sngewdei ba kane ka Board ka dei ban don bad ba ïa kane ka jingthungkam dei ban pyndep hapoh ki 3-6 bnai ban pyndap noh ïa kine ki kam ba thylli.”
Dang shen, ka Sorkar Jylla ka la thaw ïa ka Meghalaya Medical Recruitment Board (MMRB).
“Ka daw ba la thaw ïa kane ka long naba ki bun shaba palat ki kam kiba thylli bad ka MPSC kam shym la lah ban pynlong ka eksamin ha ka por kaba biang. Lada phi kynmaw, ka don ka jingthylli kumba san snem ban thungkam ïa ki doktor bad hadien ba ngi la thaw ïa ka Health Recruitment Board, ngi lah ban thungkam haduh 500 ngut ki doktor tang hapoh 3 bnai,” u la bynrap.
Haba kylli, u Sangma u la ong, ba ka Education Recruitment Board kan shimkhia ban peit ïa ki jingthungkam kiba ïadei bad ka tnat Pule Puthi.
“Namarkata, tang shu pyndep ïa kane ka jingthungkam ha ka wat banyngkong ïa ki nonghikai kaba dang ïaid shakhmat, ïa kane ruh yn sa wnarah hapoh ka Recruitment Board jong ka tnat Pule Puthi khnang ba kan don tang kawei ka Education Recruitment Board bad ïa ki kyndon thungkam na ka bynta ka jingthung ïa ki kam kiba lait yn sa bteng namarba ïa mynta ïa ki nonghikai skul la leh da ki Division Level bad kito ki jingtreikam kin ym kylla hynrei ka Management jong ka thungkam kan hap hapoh ka jingpeit jingkhmih jong ka Education Board,” u la bynrap.
