Shillong, Lber, 08: Ka Federation of Khasi Jaintia & Garo People ka la pynpaw ïa ka jingbitar ïa ka North East Sunshine Trust (NEST) India halor ka dorkhas ba ka la phah sha ka Sorkar India da ka jingkyntu ban pynim biang ïa ka kam ban tih noh ïa u Uranium na kane ka Jylla Meghalaya.
Ka FKJGP ka la maham ïa ka Sorkar Jylla ba kam dei ban ailad ïa kum kine ki seng ba kin thaw jingkulmar hapoh ka Jylla.
U General Secretary ka FKJGP Bah Eldie N. Lyngdoh u la ong ba ka kam tih Uranium ha Meghalaya ka dei ka kam kaba la pynkut naduh mynno namar ka jingpyrshah jur jong ki paidbah.
U la maham ïa kane ka seng ba kam dei ban mushlia bad pynim biang ïa kane ka kam hynrei lym kumta ka FKJGP kam banse ban tuklar bad leh ïa kaba dei ban leh.
“Ka FKJGP bad kumjuh ruh kiwei ki seng, kin ym ailad satia ïa ka jingtih Uranium ha Meghalaya. Long kat kaba long, kane ka dei ka kam ïap kam im jong ka jaidbynriew,” ula ong.
