Shillong, Lber, 08: Ka North East Sunshine Trust (India) dang shen ka la phah ïa ka Detailed Project Report (DPR) sha ka Sorkar Pdeng ban sdang noh ïa ka jingtih Uranium ha Meghalaya.
Ha ka shithi ba la phah sha u Myntri Khynnah ka Department of Atomic Energy u Dr Jitendra Singh ha ka 26 tarik, Rymphang, 2024, ka Founder Trustee bad Chairperson jong ka NEST (I) ka Kong Elizabeth Mathews Nongbri ka la ong, “ïa ka Detailed Project Report ban sdang biang ïa ka projek tih Uranium ha Meghalaya la pynkhreh da ka kynhun jong ngi.”
Ka Kong Nongbri ka ong, “ha ka 23 tarik, Naiwieng, 2023 ha ka National Ex-Servicemen Convention ha Kurukshetra, nga la ïakynduh ïa u Col Pravat Kumar Panda (Retd), Independent Director, Uranium Corporation of India Ltd (UCIL). U la wanrah ïa kane ka mat ban sdang biang ïa ka jingtih Uranium ha Meghalaya. Kumba phi tip, ka jingleh sorjamin ka Sorkar India ka lap ba u Uranium u don bun bha ha West Khasi Hills District jong ka Meghalaya. Ka jingshim nuksa ïa une u marpohkhyndew uba remdor ka long naduh khat hynñiew snem mynshwa hynrei kam shym la long kam satia, na ka daw ba ki don ki riewshim kaba kiba kawang maw ïa ka jingtrei shitom da kaba pynsngewthuh bakla ïa ki paidbah ba kin ieng pyrshah ïa kane ka jingthmu. Ïa ka ophis jong ka UCIL la pynbor ban khang khyrdep noh Shillong. Ïa ka jingïasoi soskular hapdeng ka Sorkar Pdeng bad ka Sorkar Jylla ha u snem 2009 na ka bynta ban shimwai ïa ka jaka ha West Khasi Hills, la pyndam noh ha u snem 2016. La kheiñ antad ba u Uranium u bun bha, nalor uba u long uba remdor. Katba kiwei kiwei ki jylla kum ka Jharkhand ka la ïoh jingmyntoi na ka jingdon jong u marpohkhyndew ha ka jaka jong ki, ka Meghalaya ka shong halor u marpohkhyndew uba remdor hynrei kam lah ban ïoh jingmyntoi eiei ruh em.”
Haba pyntip ba u Uranium u don kyrhai hapoh West Khasi Hills, ka kong Elizabeth ka la ïathuh ba ka NEST(India) kaba don ki briew ba ithuh ithaw ha ki shnong ki thaw bad ki stad ki jhad ban tih marpoh khyndew, ka lah ban pynurlong ïa ka kam tih Uranium hapoh ka Jylla Meghalaya.
Ka dorkhas ba la phah da ka Kong Nongbri sha u Myntri Khynnah ka Sorkar Pdeng ka dei ruh kaba la saphriang ha ka Social Media.
Ha ka ka dorkhas, ka Kong Elizabeth Nongbri ka la pynithuh ïalade ba ka dei ka Khasi bad ka dei ka nongtreikam jong ka BJP naduh u snem 2015. Ka la pynithuh ruh ba ka dei kaba ïohlok shipai bad ba kala bat ïa ki kam ba kongsan hapoh ka BJP Minority Morcha bad ruh kum ka National Executive Member.
“Katto katne na kiba ithuh ithaw, kiba la trei hapoh ka tnat Soil & Conservation ka Sorkar Meghalaya, mynta ki dei ki dkhot jong ka kynhun jong ngi. Kine kin sa ïaleh ban ïoh ïa ka jingshaniah na ki paidbah khnang ban pynsdang ïa kane ka projek. Ki la kyrpad ruh ban ïalam sha ka jaka tih Uranium ka UCIL ha Jharkhand, khnang ba kin dup lah ban pynkhreh ïa ka jinglum jingtip ba kin dup ïoh ïa ka jingkyrshan na ki paidbah,” la ong ka Kong Nongbri bad bynrap, “ngi la leh bun ki kam kiba jwat ban ïakren bad ban ïakynduh ïa ki briew kiba dei ki kynhun bapawkhmat ban sdang biang ïa ka jingtih (Uranium.”
Ka la kam shuh shuh ba ka ïoh ka kot jong ki paidbah lada pynsdang biang ïa kane ka kam kan kyntiew shikatdei eh ia ki. Nalor kata, u marpohkhyndew uba remdor tam un ïarap ban pynurlong ïa ka jingangnud jong u Myntri Rangbah.
“Ngi kyrpad namar kata, ban ailad katto katne ngut ki dkhot kynthei ka kynhun jong ngi, kiba dei ki Viksit Bharat Ambassador na ka jylla ai jait kmie ha Meghalaya, ban pyni markhmat ïa ka Policy Document and Framework for Execution ha u Myntri Rangbahduh bad ha ki ophisar jong ka UCIL ha New Delhi.
Haba pyrshang ban pan jingpynshai halor kane, ka Kong Nongbri ka ong, “ngam lah ban kren eiei (halor kane) ïa mynta. Ngan sa kren ïa phi ha kawei pat ka por.”
