Shillong, Naiwieng, 13: Ki nongñiah kamai kali saw barit ne ki Maxi Cab hadien ba la shah khang kamai lyngba ka Police Bazaar ter ter shaduh Motphran, ha la lah sngi U Blei ki la pynpaw ia ka jingpyrshah halor kane ka rai kaba la ktah shisha ia ka kamai kajih jong ki.
Ia kane ka rai ban khang kamai ia ki kali saw barit la pynmih da u Chief Executive Officer (CEO) jong ka Shillong Municipal Board (SMB) ka long ban peit haduh katno yn lah ban pynduna ia ka jingdheng kali kaba jur ha shilynter jong ka surok GS Road.
Da ka jingbitar ki nongñiah kali saw Maxi Cab ki la tur sha ka ophis treikam jong ka Shillong Municipal Board (SMB) ban dawa jingpynshai halor kane ka jingkhang ia ki ban kamai sha ka thaiñ Police Bazar ter ter shaduh Motphran.
Kine ki nongñiah kali Maxi Cab, ki la pynpaw ia ka jingpyrshah jur halor ka rai ba la pynmih da ka Shillong Municipal Board (SMB) kaba pynlong ia ki paidbah ban ym kiew shuh ha kine ki kali na ka daw ba ki hap ban pynhiar noh tang shiteng lynti kata hakhmat ka Ophis jong ka Deputy Commissioner.
Ha ka jingiakren bad ki katto katne ki nongñiah kiba tur sha ka ophis jong ka Shillong Municipal Board (SMB) bad ki bym kwah ban pynpaw kyrteng ki la iathuh ba u CEO ka Shillong Municipal Board (SMB) u la pynshai ba ka jingkhang ia ki Maxi Cab ban rung sha Police Bazar ter ter shaduh Motphran ka long tang ka jingpyrshang na ka bynta hynñiew sngi bad lada jia ba kane ka jingpyrshang kam treikam ka Shillong Municipal Board kan sa pynmih pat da kawei ka hukum.
Na ka liang jong ki nongñiah Maxi Cab ki la iathuh ba ia mynta kin ap ia kane ka shitaiew ba la buh por da ka Shillong Municipal Board (SMB).
