Shillong Lber 16: Arngut ki briew ba la shah kynnoh ba ki dei ki suba menshohnoh ki la shah bom shnong ha ki paidbhur ha ka shnong Mawthlong, East Khasi Hills District ha ka sngi Saitjain.
Ia kine ki arngut la ïoh ban pyllait im da ki Pulit na ka kti jong ki paidbhur hadien ba ki la shah tangon haban da jem jai.
Katkum ka jingioh jingtip na ki tyllong khubor la iathuh ba ha ka por kumba 11:30 baje mynstep, uwei u briew uba la 37 snem ka rta bad uwei pat uba la 20 snem ka rta, ki la shah kynnoh ba ki dei ki menshohnoh bad halor kane ka jingsuba ki paidbhur kiba don da ki spah ngut ki la kem bad bom shnong ïa ki.
La iathuh haba ki Pulit na thanad Sohïong ki la ïoh ïa kane ka jingtip marmar ki la leit sha ka shnong Mawthlong ban pyllait im ïa kine ki ar ngut hynrei namar ba u paidbah ula bun palat, ki pulit SOT na Shillong ki la leit ban synran lang bad ki la ïoh ban pyllait ïa ki arngut na ka kti ki paidbhur.
Ki Pulit ki la pynkit noh ïa kine ki arngut kiba la mynsaw jur sha Sohïong CHC bad kham hadien la pynkynriah noh ïa ki sha Shillong Civil Hospital.
La ïathuh ruh ba ki pulit ki la register case halor kane ka jingjia bad kin sa pynlong ïa ka jingtohkit kaba bniah.
