Shillong, Nailar, 17: Ka Ingbishar Meghalaya High Court ka la bthah ïa ka Sorkar Jylla ban pynlong ïa ka jingkhynra ïa baroh ki dukan bad ban daiñ ruh da ka kuna kaba heh pyrshah ïa kito kiba dang pyndonkam ïa ka plastik hapoh ka jylla Meghalaya.
Ka la bthah ruh ïa ki bor pynïaid temple ban pynthikna ba kan ym don kano kano ka jingpyndonkam ïa ki pla plastik sawdong ki jaka mane blei.
Haba bishar ïa ka PIL kaba dawa ban khang ïa ka jingpynmih, jingbuh, jingpynïaid bad jingpyndonkam ïa ki plastik, ha ka sngi Thohdieng, ka Ingbishar ha ka hukum ka la ong, “ka Sorkar Meghalaya ka dei ban peitngor ba ïa ki plastik dei ban khang naduh ka jaka rung, ngi lah ban sakhi ba ki don ki jinglum plastik ha ki dukan. Dei ban pynlong ïa ka jingkhynra manla ka por ha baroh ki dukan bad ka Sorkar Meghalaya ka dei ban daiñ kuna kaba heh bha pyrshah ïa kito kiba pyndonkam ïa ki plastik hapoh ka Jylla Meghalaya. Dei ban jingpyntreikam da ka aiñ kaba pyrkhing ban pynduh jait ïa ki plastik na ka imlang sahlang.”
“Dei ban sdang shwa na ki phyllaw jong ki Temple. Ki bor pynïaid Temple ki dei ban pynthikna ba kam dei ban don ka jingpyndonkam ïa ki plastik hapoh bad sawdong ki jaka mane blei. Dei ban jurip manla ka por ïa ki dukan kiba don hajan bad lada lap ba don ki dukan kiba don ki plastik ba la buh, dei ban daiñ kuna kaba heh ïa ki bad lada dang ïai bteng ïa kane ka jingleh, dei ban khang khyrdep. Dei ban buh ruh ïa ki CCTV ha baroh ki Temple, khnang ba lada don kiba rah ïa ki plastik hapoh ka Temple, yn dup lah ban khanglad,” la ong ka hukum jong ka Ingbishar.
Ka Ïingbishar ka la bthah ruh ba ka Sorkar ka dei ban File ïa ka Counter Affidavit ne jubab halor ki sienjam ba ki la shim ban pynduna ïa ka jingpyndonkam ïa ki plastik hapoh u pud u sam jong ka jylla Meghalaya.
Ka hukum ka la ong shuh shuh ba la pyntip ba manla u snem, ka plastik ka pynïap ïa 1 million tylli ki sim duriaw bad 100,000 tylli ki mrad duriaw, ki dkar bad ki dohkha bad namar ka jingjaboh jong ka plastik, ki mrad khlaw ki shu jah noh, namar ki jingktah na ki jaboh plastik ïa ka jingbym lah tylliat ka bam, ka jingktah ïa ka jingbym lah pynhiar mynsiem bad ka jingduhjait jong ki jingthaw ba im.
Ki mrad khlaw kum ki sim, ki Whale, ki dohkha bad ki dkar ki ïohi ïa ki plastik kum ki jingbam bad ki ïap na ka jingtyrsaw namarba ka kpoh ka dap da ki plastik. Ka dur ka dei ka nuksa kaba rim bad ka pyni kumno ka jingpyndonkam ïa ki plastik ka ktah ïa ka jingim jong jong ki dohkha dohum.
“Ka jingshim ïa ki lad ki lynti ban tehlakam ïa ka jingpyndonkam ïa ki plastik marwei ka lah ban ym ïarap, namar ki don katto katne ngut ki nongpynkheiñ ha ka ri jong ngi. Lada u nongshong shnong jong ka ri India u leit sha Singapore, un bret ïa ki plastik bad kiwei kiwei ki jaboh ha ka jaka bret ñiut da kaba tieng ïoh ngat ha ka jingshah daiñ kuna, katba kum kine ki tiar kin shah bret sha madan, haba ujuh u briew u la hiar ha India. Ka jingphohsniew ban pynkylla ïa ka ri jong ngi kum ka Singapore marwei kan ym ïarap hynrei tang lyngba ka jingpyrkhing bad ka jingdaiñ kuna kaba heh ka ban long ka lad ban pynduhjait ïa ki plastik na ka imlang sahlang, nalor ban pynphriang ïa ka jingpynshai paidbah shaphang ka jingma jong ki plastik,” la ong ka Iingbishar.
