Shillong, Naiwieng, 13: Ka tnat ka Koit ka Khiah jong ka Sorkar Jylla ha ka lah sngi U Blei ka la kyrpad ia ki Village Health Council (VHC) ban khih ban ksar da kaba wad ia kino kino kiba lah ban long ki nongtrei monsngewbha (la ki dei ki dkhot ka VHC) ban pyntyllun shakhmat ia ka kam katba ki ASHA ha ka jylla baroh kawei ki dang pynlong ia ka jingsangeh treikam kaba khlem pud sngi.
Lyngba u kyrwoh ba la phah da u Joint Secretary u TG Momin, ka tnat ka Koit ka Khiah ka la kyrpad ia ki VHC ba kin iakren bad ki paradkhot ban ai jingiarap ia ki longkmie kiba armet da kaba pynkit sha ki jaka ai jingsumar, ban pyntyllun ia ka jingai injek tika ha ka por ba la pynlong ia ka Village Health and Nutrition Day (VHND) da kaba iatreilang bad ki nongtrei Anganawadi, ban pyntip ia ki medical cases sha ki ANM bad MO bad nalor kiwei kiwei de ki kam, khnang ban pynthikna kino kino ki kam kiba iadei bad ka koit ka khiah jong ki paidbah kan ym shah ktah.
Kane ka jingkyrpad jong ka Sorkar ia ki VHC ka long hadien ba ki ASHA kiba don hapoh ka shatri jong ka Meghalaya ASHA Workers Union (MAWU) ki la pynlong da ka jingiakhih shong iing kaba khlem pud sngi halor ka jingkam ba ka jingiakren ba dang shen bad ka Sorkar Jylla lyngba ka Myntri ka Koit ka Khiah ka Dr. Ampareen Lyngdoh kam shym la long kaba seisoh hadien ba ki la pynsngew ia ki mat jingdawa ki jong ki.
“Ka tnat kaba sngewthuh ia ka bynta kaba kongsan hapdeng ka jingdei jong ki ASHA bad ka koit ka khiah, ka kyntu ia ki ASHA ba kin bteng ia ki jingshakri ki jong ki sha ka imlang ka sahlang jong ngi khlem kano kano ka jingthud. Ka Sorkar ka dang iai shaniah ia u synñiang ki nongtrei bahakhmat eh ka koit ka khiah bad ka khmihlynti ruh ia ka jingiatreilang na ki baroh na ka bynta ka bit ka biang jong ka imlang ka sahlang bad ka jylla baroh kawei,” la ong u kyrwoh.
Haba pyntip ba ka Sorkar kam ju siew tista ia ka bainong ki ASHA manla u bnai, ka tnat ka Koit ka Khiah ka la ong, ‘ka long kaba dei ban pyntip ba ha ki snem ba la leit noh, ka Jylla ka la shimkhia ia ki jingeh bad ia ki ishu ba la pynsngew da ki ASHA. Ka jingpyntreikam ia ka “ASHA First” application na ka bynta ka jingsiew bainong hapoh ka National Health Mission (NHM) ka long ka bynta bakongsan khnang ban pynthikna ba kin ioh tista ia ka bainong ha ka por ba la pyllait pisa. Ki ASHA kiba kham trei shitom ki ioh ia ka jingsiew kaba T. 7000 haduh T. 8000 shi bnai.”
Naduh u snem 2022, ka tnat ka la pyllait ia ka pisa sha ki nongtrei ASHA. Haduh T. 21.89 klur la pyllait ia ka pisa lyngba ka Application ha ki 12 bnai ba la leit noh bad haduh T. 34.50 klur ladep ban pyllait ia ka pisa ha ki 18 bnai baladep.
Shuh shuh, ka pisa kaba dang sah ban siew na ka bynta ka Meghalaya Maternity Benefit Scheme (MMBS) bad ka Meghalaya ASHA Benefit Scheme (MABS), kaba kot T. 53 klur kaba dang sah pongding naduh u snem 2013, ladep ban pyllait ha ka jylla hapdeng ki snem 2021-2022, kaba long uwei pat u mawjam.
“Ka long ruh kaba donkam ban tip ba ka Sorkar Jylla ka la ai ruh ia ka Fixed Incentive kaba T. 2000 shi bnai sha baroh ki ASHA lyngba ka State Scheme, kum ka jingithuh ia ka jingeh kaba ki ASHA ki iakynduh. Kane ka jingsiew ka long ruh wat ia ki ASHA kiba trei wat ha ki shnong kiba rit kiba dang duna ki nongshong shnong. Mynta ki ASHA ki ioh ia ki jingsiew, wat ka jingsiew taiew da kaba kam lyngba ka App,” la ong u Momin.
Lah ruh ban kdew ba ha ki jaka kiba kham shitom ka leit ka wan, ka Sorkar Jylla ka la bynshet ha ki Village Health Council (VHC) ba kin wanrah ia ki Nurse kiba la ioh jinghikai pyntbit (lada don), kiba lah ban shakri sha ka imlang ka sahlang.
“Kane ka jingtyrwa ka la iaid shakhmat. Ka long kaba kongsan ban iaiban ba ki ASHA ki dei ki bynta bakongsan tam ha kaba pyntyllun shakhmat na ka bynta ka koit ka khiah. Ka jingthud ha ka jingshakri jong ki ka lah ban ktah haduh katta katta ia ka koit ka khiah bad ia ki paidbah ka imlang ka sahlang,” la ong u Kyrwoh.
“Tang hapoh ki 18 bnai hadien ba la wanrah ia ki jingtreikam ba thymmai ba la pyntreikam da ka Jylla na ka bynta ki ASHA, sa shisien ki la mih biang ki jingbyrngem bad ki jingiakhih jong ki ASHA kaba ktah ia ka jingmut ba shisha jong ka kam shakri monsngewbha bad kaba pynthud ruh ia ka jingshakri ha ka Koit ka khiah. Ki jingiakhih ba khah khah, khamtam ha ki por ba dang pynlong ki jingiakhih, ki la don ruh ki jingjia kiba sngewsih, ba kynthup ia ka jingkhladnoh jong kawei ka longkmie ba armet ha Ribhoi District ha u snem 2022. Kum kine ki jingpynthud ia ki jingshakri ba kongsan ha ka liang ka koit ka khiah ki dei ki bym lah satia ban pdiang bad kiba lah ban wanrah ia ki jingeh ha ka imlang ka sahlang baroh kawei,” la pyntip u Joint Secretary ka tnat ka Koit ka Khiah.
