Shillong, ïaïong, 24: U Deputy Commissioner ka Ri-Bhoi District u Arpit Upadhyaya ha ka sngi baar u la pynmih ïa ka hukum ba la bthah ïa baroh ki ophisar ba hakhlieh jong ki tnad treikam bapher bapher ha Ri-Bhoi District ban long kiba peitngor namar ka jinglong jingman ha East Khasi Hills, kaba lah ban ktah ïa ki district bamarjan.
“Ban pynthikna ïa ka jingshngaiñ ki nongkynti ka Sorkar bad ban ïada na kino kino ki jingpyrshang jong ki runar ban pynjot bad pynjulor ïa ki ing ophis, ki kali sorkar bad kiwei kiwei, baroh ki District Head bad ki Ophisar la bthah ba kin buh ïa ki nongap ha ka por mynmiet, ban pynbiang lypa ïa ki Fire Extinguishers, u shyiap bad ka um ha ki ophis treikam lada don kano kano ka jingjia,” la hukum u DC.
“Ki kali sorkar dei ban pynieng ha ki jaka kiba shngaiñ ba kynthup hajan ki PS/OP/BH bad ha ki jaka ba la bthah da ka ophis jong u Superintendent of Police, Ri- Bhoi District. Dei ban kiar katba lah ban pynieng ïa ki kali ha ki jaka sah jong ki Ophisar lymda dei ki jaka kiba shngaiñ. Ïa kino kino ki jingjia dei ban pyntip mardor sha u Superintendent of Police, Ri Bhoi District, lyngba u nombar +918730940080/+919850084514 (Police Control Room), 112 (Help line),” la bthah u DC.
La pynmih ïa kane ka hukum khnang ban pyllait na kino kino ki jingshah pynjulor jong ki mar sorkar.
“La bthah ïa baroh ba kin bud pyrkhing ïa kane ka hukum khlem bakla. Kiba leh bym suidñiew kin shah pynshitom,” la maham u DC.
