Shillong, ïaïong, 24: Ki nongïalam jong ka Hynniewtrep National Youth Front, East Khasi Hills District ha ka sngi Balang ki la mudui da ka ejahar ha Sadar Police Station pyrshah ïa ki katto katne ki Kharmetor ba la kynnoh ba ki la thaw jingkulmar ha Saw Aiom Restaurant kaba don ha Iewduh ha ka 20 tarik mynta u bnai.
Ha ka ejahar ba la soi da u President u Bah Stevenson Khyriem bad u Educational Secretary u Bah Orister Mawlong ki la kam ba ki katto katne ki Kharmetor ki la thaw jingkulmar ha kane ka Restaurant bad kyntait ruh ban siew ïa ka bai bam bad wanrah pynban da ki kynhun ki Kharmetor ban thombor ïa ki Khasi bad pynthud ïa ka shongsuk shongsaiñ ha ka imlang ka sahlang.
Ka seng ka la dawa ïa ka tnat Pulit ban kem ïa kiba donkti bad ban pynshitom katkum ki kyndon jong ka aiñ.
