Shillong, Lber, 09: Ka jingbthei kaba khlain bor bha ka la mih na kawei ka ïing ka bym don shuh mano mano basah ha Them Iewmawlong ha ka sngi saitjain ha ka por kumba 10.30 baje eiei mynmiet.
Ia ka jingsawa jong kane ka jingbthei kaba khlainbor bha la iohsngew ym tang ha ki shnong kiba don marjan bad ka thaiñ Motphran bad wat ki paidbah kiba sah shaduh Golflink.
Ka kynhun lum khubor jong ka Batesi Tv kaba la poi sha kane ka jaka ba la mih ka jingbthei kaba don hajan ka jaka ieng ki Bos Smit ka la lap ba ki tin, ki lyntang ba la ker ia ka ing ki la pra bad ki iit ruh ki la pait lyngkhot lyngkhai.
Ki jaidbynriew Harijan kiba shong basah ha Them Iewmawlong ki la iathuh wat ki ing ki sem jong ki ruh ki la khih kumba khynñiuh u jumai uba jur bha ha ka por ba la jia kane ka jingbthei kaba khlain bor bha.
Ki Pulit ka Bomb Squad bad ki Pulit ka nongbah Shillong tang shu ioh jingtip halor kane, ki la leit mar mar ban pynlong ia ka jingtohkit kaba bniah ban lap ia ka daw tynrai halor kane ka jingbthei kaba la pynsuhjer bad pynmih niangkhriat ia ki briew kiba sah ha Them Metor.
Uwei u briew u la mynsaw ha ka jingbthei kaba khlain bor bha bad ia une uba mynsaw la pynkit sha Woodland Hospital ban ioh ia ka jingsumar.
Kat haduh ba la thoh ia kane ka khubor, ym pat lah satia ban tip, la ka jingbthei ka lah ban dei da u kynja bom IED ne uno uno u tiar pynbthei.
Ia ka jingtip kaba bniah yn sa nang wanrah kham hadien ynda la ioh ia ka khubor kaba thikna na ka tnat Pulit.
