Shillong, Lber, 9: Ka North East Sunshine Trust (India) ha ka sngi Saitjaiñ ka la kam ba ka shithi kaba ïadei bad bad ka jingtyrwa ban sdang biang ïa ka kam tih Uranium hapoh kane ka jylla ka dang dei tang kaba dang shu pynkhreh bad kaba ym pat phah satia sha u Myntri Khynnah ka Department of Atomic Energy ka Sorkar India u Dr. Jitendra Singh.
Kane ka jingpynshai jong ka NEST ka long hadien ba ka shithi ba ladep “thoh” ka la saphriang stet haduh katta katta ha ka social media bad shah kynthoh haban da biang ha ki kynhun kiba pyrshah ïa ka jingtih Uranium ha kane ka Jylla.
Katkum ka shithi kaba 26 tarik, Rymphang 2024, ka NEST ka la tyrwa ban phah ïa ka Detailed Project Report (DPR) na ka bynta ban pynsdang biang ïa ka kam tih Uranium ha kane ka jylla Meghalaya.
“Sngewbha peit ïa ka shithi jong ngi…kaba 26 tarik Rymphang, 2024 ba la phah sha u Dr Jitendra Sing, Myntri Khynnah ka Department of Atomic Energy, ka Sorkar India. Ka jingthoh hajrong ka shithi ka dang dei tang kaba dang shu pynkhreh bad kaba dang thmu tang ban shu sdang shwa ïa ka jingïasyllok. Ka long kaba sngewsih ba ki briew ki bym tip ki la shim rai ha ka jingstad lajong, ba ïa ka kam laitluid jong ngi la pynsdang da ka seng jong ngi ha kaba ïadei bad kane ka projek bad pyrshang ruh ban pynmih paidbah khlem ka jingtip jong ka seng,” la ong ka Founder Frustee bad Chairperson jong ka NEST (I) ka Kong Elizabeth Mathews Nongbri ha u kyrwoh ba la phah sha ka Shillong Press Club (SPC).
“Ngi ïohi ba ka long kaba donkam bad ka jingma kaba ap na kane ka projek bad la tyrwa ba dei ban bud ïa ki kyndon ban bishar bniah bin pa bin hapoh ka Sorkar Meghalaya. La pynshisha ba ka shithi ka dei tang kaba dang shu pynkhreh bad ym pat shym la phah sha u briew uba dei,” ka la ong bad pynpaw ruh ïa ka jingsngew babe lada ka shithi ba dang shu pynkhreh ka la pynmong ne ka la ktah ïa ka jingsngew jong ki paidbah.
“Ngi panmap na ka bynta ka jingleh ba khlem pyrkhat da ki briew ki bym lah ban tip kiba la shim rai halade ban pynthohbria ïa ka kynhun jong ngi,”ka la pynkut.
