Shillong, Naitung, 15: Ka jingbuh dor da ka Ganesh Das Government Maternal and Child Health Hospital, Shillong na ka bynta ka bai sumar ïa ki khunlung kiba dang shu kha hapoh ka Neonatel Intensive Care Unit (ICU) ka la wanrah ïa ka jingsngewkhia kaba jur haduh katta katta ïa ki longiing longsem kiba duk kiba leit wad jingsumar na kane ka hospital sorkar.
Tang shu ïoh ujor halor kane, ka Hynniewtrep Youths Council (HYC) ba la lamkhmat da u President u Bah Roy Kupar Synrem ki la leit ban ïakynduh ïa ka Medical Superintendent (Joint Director of Health Services) jong ka Ganesh Das Hospital ban pan jingpynshai halor kane.
Ka jingpynmih ïa ka jingpynbna ban buh dor thymmai ka la kot T.1500 shi miet na ka bynta ban sumar ïa ki khunlung ba dang kha ha ki Ventilator, ban ai Oxygen, ban pyndait ïa u Centralline, ban ai dawai bad kiwei kiwei ki jingsumar.
Ha ka jingïakren bad ki lad pathai khubor u Bah Synrem u la ïathuh ba ïa ka jingpynbna la pynmih da ki bor pynïaid jong ka Ganesh Das Hospital ha ka 5 tarik, Nailur, 2024 Committee.
“Ngi tip bha ba ki briew jong ngi na kylleng ka jylla ki dei kiba duk. Hadien ba la la pynmih ïa ka jingpynbna ba la oh dor ïa ka bai sumar ngi la wan ban pan jingpynshai na ka Medical Superintendent,” ong u Bah Synrem.
Ka jingpyntreikam ïa ka dor ban sumar ïa ki khunlung ka dei ha ka Neonatel Intensive Care Unit (ICU) kaba dang shu plie thymmai bad kaba don 40 jingthiah.
U la ong ruh ba katkum ka jingïathuh jong ka Medical Superintendent, ki nongpang kiba don ïa ka MHIS Card kim donkam satia ban siew ïa ka bai sumar.
“Hynrei ngi shem ba bun na ki briew jong ngi, kim don ïa ka MHIS Card bad namarba kim pynïasnoh bad u Aadhaar bad lada ym pynïasnoh bad u Aadhaar ki duh ïa ki jingmyntoi,” u la ong.
U la pynpaw ruh ba katkum ka Khanasamari 2011 ym baroh ki longiing ki don ïa ka BPL Card bad ka Ration Card.
