Shillong, Nailur 14: Ka Khun Hynñiewtrep National Awakening Movement (KHNAM) ka la buh jingkylli halor ka jinglyngkot shaba palat ka Dorbar Synrai jong ka Ingdorbar Thawaiñ ka Jylla ka ban sdang ha ka sngi Thohdieng.
“Lashai la 15 tarik, Nailur, 2023 kan sdang ka Dorbar Synrai jong ka Iingdorbar Thawaiñ ka jylla. Ka jingbuh por tang san sngi ban pynlong dorbar ka pynpaw shai kdar ba ka Sorkar Jylla ka kwah ban kiar ia ki jingkylli kiba bun kiba ktah ia ka jylla baroh kawei,” ong u kyrwoh ba la phah da u Working President ka KHNAM-CEC u Bah Thomas Passah ha u kyrwoh ba la phah sha ki lad pathai khubor.
“Ngi kwah ruh ban buh ka jingkylli halor kano ka nongrim ka Business Advisory Committee (BAC) ka buh tang san sngi, kan bha ba ynnai pynlong dorbar hi lada ka dei kumne tang san sngi. Ka dorbar kaba ladep ruh ka lyngkot bha bad kane ruh kajuh hi, lada ka long ha kane ka rukom ka la shongnia ban iakren ia ki mat ki jura ha ki surok ym shuh ha Iingdorbar,” u la ong.
“Ka KHNAM ka pynrem jur ia kane ka Sorkar khappud bad ka Sorkar leh donbor,” la kynthoh ka KHNAM.
“Ha kine ki san sngi ngin khmihlynti ban don ban kylli ia u Myntri Rangbah halor ka Inner Line Permit (ILP) bad sa haduh katno kan shimpor ia ka Sorkar Pdeng ban mynjur noh ia ka ILP kumba la dawa da ki 60 ngut ki MLA ha u snem 2019, lada ym don ba kren kan dang pynskhem ia ka jingmut ar maloi jong ki nongmihkhmat halor ka ILP,” la bynrap u kyrwoh.
