Khliehriat, Nailur, 14: Ka East Jaintia Hills Truck Owner & Transporter Association (EJHTO&TA) ka ai jingkyrshan kaba pura ia ka Synjuk Waheh Shnong East Jaintia Hills District, ia ka Khasi Students’ Union-(KSU) Narpuh Circle bad ia ka Jaintia Students’ Movement –Eastern Region halor ka jingaipor khatduh ia ka Sorkar Jylla ba kan maramot noh wut wut ia ka surok National Highway-6, kaba la sniew mynta shaba palat pud.
“Ka surokbah NH-6 ka dei u thied snam ym tang jong ka jylla Meghalaya, hynrei jong kiwei pat ki jylla ha thaiñ Shatei Lammihngi jong ka Ri India. Ka jingsniew palat jong kane ka surok ym tang ba ka la ktah ia ki paidbah nongleit nongwan, hynrei ka la buh ruh ha ka jingma kaba khraw bha ia ki kali bad khamtam eh ia ki mynsiem ba kordor, kiba dei iaid lyngba jong kane ka surok”, ong u President jong ka EJHTO&TA u Bah Kyrshan Dkhar.
“Ka surok, ka nam te National Highway, tangba ka kam pat tang kum ka surok shnong ruh ym ikop”. U paidbah ia mynta u la sah ha ka umdum namar ngim tip don aiu sha lyndet, kat haduh ba ki bor sorkar ba dei peit ia kane ka surok ki la shu ieh beiñ shisha haduh katne katne, i kumba ki paidbah ba don kali ki khlem siew ia ki khajna surok, kat haduh ba ki kali naduh kiba heh haduh kiba rit tam bapli kim long shuh ban iaid lynti lyngba jong kane surok,” ong u Bah Kyrshan Dkhar.
“Ki paidbah baroh ia mynta ki la bitar bha halor ka jinglong jingman jong ka surok NH-6. Kumta na ka bynta ka bha ka miat jong ki paidbah, ha kaba iadei bad ka jingsniew palat jong ka surok, ka EJHTO&TA, ka dawa ia ka Sorkar Jylla haduh ka Sorkar Pdeng ba ki dei ban maramot noh mardor ia kane ka surok,” bynrap u kyrwoh.
