Shillong, Risaw 16: U Vice President ka Ri India u Jagdeep Dhankhar ha ka sien ba nyngkong eh ba u la wan iuhkjat hapoh ka Jylla ha ka sngi Balang u buh nongrim ban tei ïa ka Meghalaya Skill and Innovation Hub (MSIB) ha ka jingïalang kaba la long ha State Convention Centre, Shillong.
Ïa u Vice President jong ka ri, la synran lang da u Lat ka jylla u CH Vijayashankar, u Myntri Rangbah ka jylla u Conrad K Sangma, ka Myntri ka tnat Koit ka Khiah ka Dr. M. Ampareen Lyngdoh, u Myntri ka tnat Animal Husbandary u Bah AL Hek, u Chief Secretary ka Jylla u Bah Donald P. Wahlang bad kiwei ki heh Sorkar, nalor ki samla pule.
Ha kane ka sngi, u Vice President u la plie paidbah ruh ïa ka CM Business Catalyst: Student B-Plan Challenge bad ka IIM Shillong bad u la sakhi ruh ïa ka jingïasoi ïa ka Memorandum of Understanding (MoU) hapdeng ka UNDP bad ka Sorkar Meghalaya ban kyntiew ïa ka kam seng kam seng jam.
Ïa ka Meghalaya Skill and Innovation Hub (MSIB) yn shna ha ka jaka kaba heh kumba 6.54 akar ha New Shillong ha ka jinglut kaba T.77.5 Klur bad kane ka MSIB ka dei ka jaka ban pynbiang ïa ka jingdonkam jong ki samla na ka bynta ka jingai jinghikai, ban sengkam lajong bad ban ïatreilang bad ki karkhana.
Haba kren ha ka jingïalang, u Dhankhar u la ïaroh ïa u Myntri Rangbah ka Jylla u Conrad K Sangma na ka bynta ka jingïarap bapher bapher ka ban pynroi ïa ka sap jong ki samla nongshong shnong ka Meghalaya.
U Dhankhar u la ong ba ïa ka kam kaba ha khlieh duh jong ka Ri ka President, la bat da ka kynthei, kaba dei ka riewlum bad ka heh Pulit lane DGP jong ka Meghalaya ruh la bat hi da ka kynthei kaba dei ka riewlum bad kane ka pyni ïa ka jingkylla hapoh ka Ri.
U la ong ba ka MSIB kan ïaid lynti jngai ban kyntiew ïa ka kam seng kam seng jam ha ka Jylla bad u la kular ruh ba ka tnat Human Resources jong ka Meghalaya kan ïoh ka jingkyrshan da ka jingdon ïa kane ka Centre.
“Ka jingtbit jong ki samla ka dei ka jingdonkam jong ka por” la ong u Vice President.
U Dharkhar u la ong ba u Myntri Rangbahduh ka Ri u Narendra Modi u la plie ïa ka jingkhang na ka bynta ki samla lyngba ki jingai jinghikai pyntbit bad ki jingsengkam (Start-up) prokram bapher bapher hapoh ka Ri.
U la pyntip ruh ba la mang T.60,000 klur na ka bynta ban pyntbit ïa ki san lak ngut ki samla ha ki san snem ban wan ha ka ri.
“Ka jingpynkupbor ïa ki samla kan pynthikna ïa ka jingkiew ha ka ïoh ka kot ha ka ri,” u la ong shuh shuh.
U Lat ka Jylla u CH Vijayashankar haba ai jingkren u la pynpaw ïa ka jingkhlaiñ bad ka jingriewspah jong ka Jylla ka ban ailad ïa ki samla ban ieng ha la ki jong ki kjat lyngba ki jingseng kam bapher bapher.
Katba u Myntri Rangbah ka Jylla u Conrad K Sangma u la ong ba ka jingdon ki samla jong ka Meghalaya ka dei ka bor jong ka.
U la ong ba ka Sorkar ka kyrshan ïa ka kam seng kam seng jam ha ka rukom kaba heh bad ka jingthaw da ka MSIB bad kiwei ki jaka ai jinghikai pyntbit ka long ban weng ïa ka jingduna briew ha ka sengkam sengjam.
“Haduh 85 percent na ki nongshong shnong jong ngi ki don hapoh ka rta kaba 45. Ki samla ki dei ka bor bad ka jingdon jingem kaba khraw tam jong ngi bad ngi la sdang ïa ki prokram ban ai jinghikai pyntbit khnang ba ki samla kin long ka bor khamtam ha ka sengkam sengjam lajong” la ïathuh u Conrad.
U la ong shuh shuh ba ka Sorkar ka don ki prokram bapher bapher ban ai jinghikai ïa ki samla, khnang ba kin lah ban noh synñiang kaba kyntiew ïa ka roi ka par jong ka Jylla.
U la ong ruh ba Sorkar ka pynlong ïa ki jingïakop Business Plan bapher bapher bad ka kyrshan ïa ki nongseng kam. “Ngi ai jingkyrshan bad ban btin ïa ki nongseng kam seng jam jong ngi lyngba ki prokram kum ka CM Elevate da kaba ai jinghikai pyntbit bad ban ai jingïarap pisa,” la ïathuh u Sangma.
