Shillong, K’lyngkot, 04: U National Vice President jong ka BJP uba peit ruh ia ka jylla Meghalaya u Dr M Chuba Ao ha ka sngi Palei u la ong ba ka party ka la buh thong ban jop 400 seat ha ka Elekshon Lok Sabha ka ban sa long shen.
Ha ka jingiakren bad ki lad pathai khubor hadien ba la wai ka jingialang pyrkhat kam na ka bynta ban pynkhreh ia ka elekshon ha Meghalaya, u Dr. Ao u la ong, “ka thong jong ngi ka long ban jop 400 seat ha kane ka kynti. Namarkata, ngi hap ban leit sha manla ki jaka ba ngim shym la ioh eiei mynshwa bad ngin trei shitom ban poi lut sha ki kyndong kynshrot.”
“Ngi ngeit ba ngin kynjoh sha ka thong bad kata ka dei ka mishon jong ngi mynta ka sngi,” ula ong.
U Dr. Ao u la ong ba ki don ruh katto katne ki Seat kiba tlot bad ki don ruh katto katne ki Seat kiba long beit tang hapoh ka thaiñ hynrei ka party kan pyrshang ban treikam janai ban poi sha kine ki Seat.
“Ha ki ar tylli ki elekshon ba ladep, ngi la iohi ba kam shym la seisoh satia hynrei mynta ka kynt, ngi leit ha kata ka rukom kaba ngin pynsngewthuh sha ki paidbah,” u la bynrap.
Une u nongialam ka BJP u la ong ba ka party kan iakhun beit marwei ia ka Elekshon Lok Sabha khlem ka jingiatreilang bad kano kano ka party.
“Ngin ym iatreilang bad kano kano ka party. Haba ngi la pynkhlain bha ialade, balei ngin ailad ia kiwei pat. Namarkata, ngi la rai ban iakhun beit marwei. Kan ym don kano kano ka jingiasam ha ka jingiakhun,” u la bynrap.
Haba kylli, u Dr. Ao u la ong ba ka BJP ka khlain bha na Shillong bad Tura Parliament Seats ha Meghalaya.
“Ha ka jingshisha baroh ar tylli ki Seat ki dei kiba khlain. Ngi hap ban shim ia ka jingkitkhlieh ba ngim lah ban poi lut sha ki kyndong kynshrot,” u la ong.
Ha kaba iadei bad ka jingpynieng kyrtong, u Dr. Ao u la ong ba ka party kan trei shwa bad hadien kata, kan sa shong ban iapyrkhat bad ka kynhun jong ka Jylla bad ban iasyllok bad ki nongialam bahalor jong ka party bad ban pyrkhat lang bad u Myntri Rangbahduh ka ri lem bad u Myntri ka tnat Kam Pohing ban shim rai iano ban ai tiket.
U ong ba bun ki briew ki la wan pynsngew ha ka party na ka bynta ka tiket.
Haba kylli, hato ka party kan pynieng neem da u Bah AL Hek uba long u MLA ka Pynthorumkhrah na Shillong constituency, u Dr. Ao u ong, “nga la iohi ha ki lad pathai khubor hynrei ngam pat iakren eiei ruh em bad u.”
U la ong ruh ba ka party ka don ia ka bhah kyrpang na ka bynta ki kynthei ban pyniakhun ha ka elekshon.
