Shillong, K’lyngkot, 04: Ka shnong Kongthong ha ka sngi Palei ka la rakhe ia ka Hamara Sankalp Viksit Bharat ha kaba u Deputy Secretary jong ka Ministry of Women and Child Development ka Sorkar India u Bhaskar u la long u Kongsan ryngkat ka jingdonlang jong ka Additional Deputy Commissioner ka East Khasi Hills District ka Kong DD Syngai bad u BDO jong ka Khatarshnong-Laitkroh C&RD Block u Bah PS Tyngsong.
La pdiang sngewbha ia kine ki kynrem ki lyndan da ki paidbah nongshong shnong jong ka shnong Kongthong hapoh ka jingialam jong u Sordar Bah Teibor Lynrah lem bad u Bah Rothel Khongsit nakhmat ka AMRIT Mahotsav Gate terter ryngkat ka kynhoi ka phawar bad ka jingtem ia ka ksing bad ka jingput ia tangmuri.
Ki ophisar kiba la sakhi lang ha kane ka sngi, ki la ai ruh ia ka jingpynshai shaphang ki shkim bapher bapher kynthup ia ka tnat Pule Puthi, ka rep ka riang, ka ri jingri, ka koit ka khiah, ka umbam umdih, ka Social Welfare, ka NRLM, ka tnat Labour bad kiwei.
Da ki spah ngut ki nongshong shnong ki la iashim bynta lang ban sngap ia ki jingpynshai na ki ophisar jong kine ki tnat treikam ka Sorkar.
Shwa ban pynkut ia ka jingialang la pynlong pat sa ia ka jingpyni kolshor da ki nongshong shnong ryngkat ka drama na ki dkhot jong ka Village Organization jong ki SHG.
Kum ban shu pynkynmaw hangne, ia ka shnong Kongthong la shimti da u MP ka Rajya Sabha u Prof. Rakesh Sinha hapoh ka Sansad Adarsh Gram Yojna (SAGY-II).
