Shillong, Naitung 01: Lai ngut ki snar khaii drok ba kynthup ïa arngut ki Khasi ïa kiba la tip kyrteng kum u Ronand Kyndiah na Sngithiang Lower Mawprem bad u Daniel Syiem na Lower Mawprem bad uwei pat u Manipuri ïa uba la tip kyrteng kum Thokchom Naba Singh na ka shnong Kangmong, Imphal West, Manipur ki la shah kem ha ki Pulit ka Ri-Bhoi District halor ka jingdonkti ban pynïaid iew ïa u drok.
Katkum u kyrwoh ba la phah da ki pulit ka Ribhoi District, ha ka janmiet sngi thohdieng ki pulit ki la ïoh ïa ka jingtip kaba bniah ba ki don lai ngut ki briew kiba la tip kyrteng kum u Ronand, u Daniel bad u Naba Singh ki la ïakynduh ha kawei ka Farm House ha ka shnong Lumkeni, Umran, Ri-Bhoi ban pynïaid iew ïa u drok.
Hadien ba la ïoh jingtip, ki pulit kiba la pynap shrip ha lad surokbah NH-06 Umsning Bypass ryngkat bad ki pulit ka Umsning Police Station ki la ïoh bat ïa kawei ka kali Alto rong iong kaba don ïa u nombar ML05-K-0314 ba la shong arngut ki briew. Ki Pulit ki pynpaw ba kine ki arngut ki la ïathuh ba ki kyrteng kum ku Ronand Kyndiah bad u Daniel Syiem na Shillong. Nalor kata, ki Pulit ki la ïathuh ba ki la bat noh ïa kine ki arngut hadien ba ki la kyrngah ban ïathuh ïa ka jaka ba la buhrieh ïa u drok.
Ha ka jingtohkit ki la kynnoh ba u Naba Singh uba donkti ban khaii ïa u drok u la hiar sha Guwahati. Mar mar ki Pulit kiba la pynap shrip ha hajan Byrnihat Out Post ki la ïoh bat ïa u Naba Singh.
Shuh shuh ka jingtohkit ïa kine ki lai ngut, ki la phla ba ki la buhrieh ïa u drok ba la song bha hapoh ka Farm House kaba don ha ka shnong Lumkeni, Umran.
Ha ka sngi Saitjaiñ ki Pulit ka Ribhoi District kiba la ïalam da ki ksew na ka K9 Dog Squad jong ka CID ki la pynlong ka jingkhynra ïa ka Farm House. Ki ksew ki la ïoh sma dien ïa kawei ka synduk nar ba la suba ba la thep ïa u drok. Hadien ba la lied ïa ka synduk nar, la lap ïa ki 70 tylli ki synduk thep sabon kiba la thep ïa u powdar rong soh bad hadien ba la leh test la pynshisha ba u dei u drok Heroin.
Katkum ka jingïathuh ki Pulit, u drok ba la ïoh kurup na ki 70 tylli ki synduk thep sabon u shongdor 5 klur tyngka. Ki Pulit ki la kurup noh ïa ka kali Maruti Alto bad 4 tylli ki Mobile Phone.
Ka tnat Pulit jong ka Jylla Meghalaya lyngba ka jingbthah jong u Myntri Rangbah ka Jylla u Conrad K. Sangma bad hapoh ka jingkhmih jong u Director General of Police (DGP) u Dr. LR Bishnoi ka la ïakhun thma pyrshah ïa ka kam khaii drok ban pyllait luid ïa ka jylla na u drok.
