Shillong, Jymmang, 08: Ki bor synshar jong ka East Khasi Hills kiba la hiar jurip ia ka jaka sah beain ki poiwir ha Lum Survey ryngkat ka jingsynran lang jong ki nongmihkhmat ka Defence Estate Officer, Guwahati, bad ki dkhot ka Hynñiewtrep Youths Council (HYC) ki la lap ba kiba bun na ki briew kiba sah ha kane ka jaka ki dei kiba wan na ka ri Bangladesh.
Kane ka jingkynnoh ka la mih na ki lai ngut ki briew kiba shong dukan ha Lum Survey, kiba dei ruh ki briew kiba dang ïakhun da ka mukotduma ban kam trai ïa kane ka jaka kaba ki la shna dukan.
Kine ki lai ngut kiba iakhun mukotduma ki la synran lang ha ka jingjurip jong ka Ophis u Deputy Commissioner ka East Khasi Hills District bad ka Ophis u Defence Estate Officer, Guwahati ha ka jingïadon ryngkat ki Ophisar ka Shillong Municipal Board, ka Shillong Contonment Board, ka Meghalaya Urban Development Agency bad ki nongïalam ka Hynñiewtrep Youth Council.
Na ka liang ka Municipal ka la lum kyrteng ïa baroh ki briew kiba la kynnoh shna iing be-aiñ ha kane ka jaka bad la lap ba ki don haduh 80 tylli ki iing tap shiliang. Nalor kata, la lap ba 40 tylli ki ing ki la khang tala shwa ban don kane ka jingjurip.
La kynnoh ba bun na kine ki briew ki dei ki Muslim kiba kam ïalade ba ki dei kiba wan na Assam, Uttar Pradesh bad kiwei kiwei ki Jylla ka Ri.
Kane ka jingjurip ka la wan jia hadien ka jingdawa jong ka Hynñiewtrep Youth Council (HYC) ban kyndang ïa baroh ki ïing ba shna be-aiñ ha Lum Survey.
Halor kane, shen u Magistrate un sa aiti noh ïa ka kaiphod sha u Deputy Commissioner ka East Khasi Hills ba un leh ïa kaba donkam.
“Ki briew jong ka bor Disrict kila pynlong ïa ka jingsorjamin bad ki la shim jingkheiñ ïa ki longïing bad ki lap ba ki don palat 80 tylli ki iing ba shong be-aiñ ha kane ka jaka ba hap hapoh ka Defence Estate Office. Ngi sngewnguh ïa u DC ba u pynlong ïa kane ka jingjurip shuwa shi taïew ba ngi ai por,” ong u President ka HYC Roy Kupar Synrem ha ka jingïakren bad ki nongthoh khubor.
U la ong bun na ki briew ba sah beaiñ ha kane ka jaka ki dei na Assam, Uttar Pradesh bad kiwei kiwei ki Jylla.
“Ngin ap mynta ïa ka kaiphod ka ban aiti da u Additional Magistrate sha u DC,” ong u Bah Roykupar.
“Ngi ïeng skhem ha ka nongrim ba lada kim lah eiei pyrshah ïa kine ki Ïing be-aiñ wat hadien ka jinglap ïa ka jingshisha na ka jingjurip, kan pynbor ïa ngi ban shim ïa kane ka kam ha la ka kti da kaba kyndang ïa kine ki briew bad lada mih kano kano ka huri hura, u Deputy Commissioner bad ka DSO kin hap ban shim ïa ka jingbahkhlieh,” la maham u Bah Synrem.
