Shillong, Jymmang, 09: Ki nongiakhun kti ka jylla Meghalaya kiba don hapoh ka shatri jong ka Meghalaya Arm Wrestling Association ha ka 3 tarik, Jylliew 2024, kin sa mih na kane ka nongbah Shillong ban leit iashim bynta ha ka lympung iakhun kti kaba la tip kum ka National Arm Wrestling Championship 2024, ka ban sa long ha Nagpur Maharashtra ha ka 6 tarik haduh ka 10 tarik u Jylliew 2024.
Katkum ka jingiathuh jong ki nongialam jong ka Association, ki nongiakhun kti ki ban sa leit iashim bynta ha kane ka lympung ki don haduh 83 ngut ba kynthup ia ki Sub-junior, Junior, Youths, Senior, Master, Grantmaster bad ki Para-Atheletic Specially Abled.
Na kine ki nongiakhun, ki Kynthei ki don 40 ngut, ki shynrang 43 ngut, uwei u Referee bad 2 ngut ki Official.
Ki nongiakhun kiba jop na kane ka lympung kin shah jied ban iakhun sa ha ka World Level ka ban sa long ha ka ri Maldova ha u bnai Nailar 2024.
Ka Prisca Pyngrope kawei na ki thei iakhun kti ha ka kyrdan Para-Atheletic Specially Abled ka la iathuh ba kane ka dei ka sien banyngkong eh ba kan leit iashim bynta ha kane ka lympung iakhun ka ban sa long ha ka jylla Maharashtra.
“Nga la shu iashim bynta ha ka marathon, Wheel Basketball bad kane ka dei ka sien kaba nyngkong ba nga kwah ban iashim bynta ha ka Arm Wrestling,”la ong ka samla Prisca.
Haba kylli ka la ong, “wat lada ngam jop ruh hynrei nga kmen ba nga la ioh ban mihkhmat ia ka jylla lajong. Ngan pyrshang ban iakhun beit.”
