Shillong, Lber, 6: Ka tnat elekshon bad ka tnat Pule Puthi ka Sorkar Jylla ha ka sngi Balang ki la iasoi ia ka soskular iasngewthuh jingmut (Memorandum of Understanding) ban pyntreikam da ka Electoral Literacy Clubs (ELC) khnang ban pynrung kyrteng ia ki samla pule kiba la kynjoh 18 snem ka rta ba kin ioh ia ka Electoral Photo Identity Card (EPIC) shwa ba ka ri India baroh kawei kan leit sha ka elekshon Lok Sabha ka ban sa long shen.
Ia ka MoU ba la iasoi da u Chief Electoral Officer (CEO) Jylla u Dr. BDR Tiwari bad u Director ka School Education and Literacy u Swapnil Tembe ka dei kaba la bthah da ka Election Commission of India (ECI) khnang ba ki samla kiba la kynjoh 18 snem ka rta ki dei ban ioh ia ka EPIC khnang ba kin ioh ia ka lad ban jied ia ki nongmihkhmat sha ka Parliament.
“Ia kine ki ELC yn sa buh ha ki jaka pule Higher Secondary School bad ha ki College. Ka jingthmu ban buh ia ki ELC ka dei kaba la slem bad ki dang treikam haduh mynta hynrei ki don pat katto katne ki bym treikam,” ong u Tiwari ha ka jingiakren bad ki lad pathai khubor hadien ba iasoi ia ka MoU.
U ong ruh hadien ka jingbthah jong ka ECI la pynbha ia ki katto katne ki kyndon jong ka MoU.
Shuh shuh u la ong ba ki nonghikai kin dei ki Nodal Officer jong ki ELC. U Swapnil Tembe u la phah ia u kyrwoh sha ki khynnah skul ia ka jingangnud jong ka sorkar ban pynngewthuh ia ka synshar paidbah.
“Ka khubor ka don ha ki lynnong kot bad ka dei ruh ka mat ba la kdew ha ka MoU,” u la ong.
“Ngi la thaw ia ki Electoral Club mynba nga dang long u Deputy Commissioner saw snem kynthih bad nga dang kynmaw kyndiang haba ngi la thaw ia ki ELC ha ki District Level. Mynta, hadien ka jingiasoi ia ka MoU ngin pynthikna ban sa peitngor bha ia ka jingtreikam jong ki ynda la thaw ha ki Secondary School,” u la bynrap.
“Kawei ka mat ba kongsan kaba la kdew ha ka MoU ka long ba ki khynnah skul kiba la kynjoh 18 snem ka rta ki dei ban don ia ka EPIC namarba nga kynmaw ba bun ki khynnah kiba la kynjoh 18 bad 19 snem ki dei ki bym pat don satia ia ka EPIC,” la ong shuh shuh u Tembe.
