Shillong, Lber, 06: Ka tnat District Council Affairs (DCA) jong ka Sorkar Jylla ha ka sngi Balang ka la thaw da ka Komiti hadien ba ki Autonomous District Council (ADC) ki la ai jingmut sha ka Sorkar ban pyntreikam ia ka Meghalaya Building Bye Laws sha ki shnong nongkyndong jong ka Jylla.
Kane ka jingai jingmut jong ki ADC ka long hadien ba u Symbud Myntri Rangbah ka Jylla Bah Prestone Tynsong uba khmih ia ka tnat District Council Affairs u la khot da ka jingialang ia ki Autonomous District Council, ia ki ophisar ka tnat DCA bad ka tnat Revenue ban iathir iatai halor ka jingpyntreikam ia ka Meghalaya Buidling Bye Law da ka Meghalaya Urban Development Authority (MUDA) hapoh ki jaka kiba hap hapoh ka jingkhmih jong ka Municipal bad ki Autonomous District Council (ADC) ha ki Sheduled Area.
Hapoh kane ka Komit ka ban khlieh da ka Secretary jong ka tnat Urban Affairs ka Kong Renette C. Sohkhlet yn sa kynthup lang ia ki dkhot jong ki lai tylli ki Autonomous District Council (ADC) bad ki tnat treikam bapher bapher jong ka Sorkar Jylla.
U Symbud Myntri Rangbah Bah Prestone Tynsong haba kren sha ki lad pathai khubor hadien ba la wai ka jingialang, u la ong, “ha u snem 2019, ngi dang ai shuh shuh ki Notification 2021 ba ngi la aiti ban pyntreikam ia ka Building Bye laws lyngba ka MUDA bad ki ADC. La shaniah ha ka MUDA ban ai jingbit na ka bynta ka jingpyntreikam ia ka Building Bye Laws hapoh u pud u sam ka Municipal na ka bynta ki jingshna ia ki ophis, ki Hotel, ki Hospital bad kiwei kiwei ki jingtei kiba heh katba ia ki jaka kiba don shabar jong ka Munipal la aiti beit ha ki Autonomous District Council.”
U la iathuh ba ka jingai jingmut jong ki Autonomous District Council ban pyntreikam ia ka Building Bye Laws sha ki shnong nongkyndong ka long namarba ka Jylla Meghalaya ka dei la lynti iaid jong u jumai bad ba la donkam ban don da ka aiñ ba pyrkhing ban tehlakam ia ka jingshna iing bad kino kino ki jingtei kiba heh.
Shuh shuh u Myntri Rangbah u la iathuh ba ka jingialang ka la rai ban thaw ruh da ka Komiti ka ban khlieh da u Secretary jong ka District Council Affairs (DCA) Bah Cyril V. Diengdoh ka ban kynthup lang ia ki nongmihkhmat na ki ADC, na ka tnat Law, Revenue bad RTS khnang ban bishar bniah ia ka Indian Registration Act shwa ban pyntreikam hapoh kane ka jylla.
“Ka jingrejister ia ki jaka ka dei kaba ngi hap ban bud ryntih katkum ka Indian Registration Act. Haba ngi bud ia kane ka Aiñ, ki don katto katne ki jingeh haba ki paidbah ki leit sha ki District Council ban pan ia ka Land Holding Certificate ne ka NoC ne kino kino ki dulir haba ki kwah ban pan ram na ki Bank hynrei haba ki leit rah ia kine ki dulir ba la ai da ki Autonomous District Council ki Bank kim pdiang satia. Sa shisien ngi la iakren sani bad ngi la rai ban thaw ia ka Komiti ban khmih bniah biang ia ka Indian Registration Act, khnang ba ki kot ki sla ba la ai da ki Autonomous District Council dei ban ai jingithuh da kino ki shnat treikam bad ki Bank,” ong shuh shuh u Symbud Myntri Rangbah.
