Shillong, Nailur 21: Ka seng kieng atiar ba la shah kheiñ be-aiñ Hynñiewtrep National Liberation Council (HNLC) ha ka sngi palei ka la rakhe ia ka ‘martyr’s day’ kum ka jingai burom ia ki nongialam bad ia ki dkhot ba ehrang jong ka seng kiba la len lade ban iakhun pyrshah ia ka jingdakhol jubor bad khñiot beiñ jong ka India.
Ha u kyrwoh ba la phah sha ki lad pathai khubor, u General Secretary cum Publicity Secretary jong ka HNLC u Bah Saiñkupar Nongtraw u la ong ba u Sambor Mawthoh ba ju khot sin u Dengdeng u la don ha ka jaka kaba kongsan tam ha ka pakit ki mynnor jong ka HNLC.
U la duhei ia la ka jingim kum u dkhot jong ka HNLC ha ka jingiather kuli bad ki pulit ka Meghalaya ha ka 21 tarik Nailur 1994 ha Jaiaw. Kum ka jingithuh ia ka jinglenlade jong u, ka HNLC ka la pynbna ia kane ka sngi kum ka Martyrs’ Day jong ka seng, ong u Bah Nongtraw.
U la ong ba ka HNLC ka ju buh jingthoh ia baroh ki dkhot bad ia ki nongialam kiba la aiti lut ia la ka jong ka jingim na ka bynta dawbah ka ‘ri Hynñiewtrep.
“Ka snam ba la phlei da kine ki samla kiba shlur kam shym la long lehnohei, kumba ka HNLC ka angnud ban pynthikna ba ka jingiakhun jong ngi kan long shi bynta jong ka histori,” ong u General Secretary bad bynrap, “kane ka sngi bakongsan ka dei ka jingrakhe bad ka jingaiburom ia ki nongialam ba shlur bad ia ki dkhot kiba la len lade ha ka jingiakhun ba khlem shongthait pyrshah ia ka jingdakhol bad ka jingkhñiot beiñ ka India. Ka dei ka sngi kaba kyrpang ban ai burom ia kito kiba iakhun khlem jingsheptieng na ka bynta ka hok bad ka jingangnud jong ki briew jong ki. Ka jingaiti bakhlaiñ, ka jinglen lade bad ka jingiakhun ba khlem thait ban wad ia ka hok bad ka jinglaitluid. Ha kane ka sngi, ngi shim ia kane ka khyllipmat ban kynmaw burom ia ka jinglen lade jong ki bad ngi pynpaw ruh ka jingsngewnguh shikatdei ei na ka bynta ka jingaiti lut bad ka jingshlur.”
U Bah Nongtraw u la ong ruh ba ka jingpynkha ia ka HNLC la pynshong nongrim halor ki hok jong ka pakit ki mynnor.
“Bun ngut ki samla ki la pyniasoh bad ka HNLC, kiba la pynkhreh ban thoh biang sa shisien ia ka Histori,” u la ong.
U la ong ba kam pat ju don kano kano ka jingiakhih ba khlem iaumsnam ha ka histori
Katkum ka jingong jong u, ka jingiakhih ba khlem iaumsnam kan ym treikam daleilei lymda ki nongkhñiot beiñ kim don ia ka mynsiem iatiplem.
“Ai ba mynsiem jong kito ki khlawait ba la khladnoh kin ioh ia ka jingjahthait bymjukut, bad ai ba ka kyrteng jong ki kan nang iai bteng ban ai mynsiem ia ki pateng ki ban sa wan ban ieng pyrshah ia ka jingshah leh bym hok bad ka jingshah khñiot beiñ. Ka jingrakhe ia ka Martyrs Day ka pynkynmaw biang ia ka kam kaba ki la leh, ka kyntu ia ngi ban pyntyllun shakhmat ia ki jingangnud jong ngi bad ban ym kyrkieh ban kthong ia ka hok bad ka jinglaitluid na ka bynta ka ri Hynñiewtrep,” ong u Bah Nongtraw.
