Shillong, Nailur 20: Ka Khun Hynñiewtrep National Awakening Movement (KHNAM) ka pynpaw ka jingsngewnguh ïa u MLA jong ka Mookaïaw Constituency u Bah Nujor Sungoh uba la rah ïa ka mat ha ka Dorbar Synrai jong ka Iingdorbar Thawaiñ ban pynduh noh ïa ka Personal Interview ha ki kam Sorkar ha ka kyrdan Grade IV.
“Ka seng naduh ki snem ba la leit noh ka ladep ai ïa ki jingthoh kiba shai bad kiba shong-aiñ sha u Myntri Rangbah ka Jylla ban dawa ban pynduh noh ïa ka Personal Interview na ka Grade B,C bad D jong ki kam Sorkar bad ngi la pynshai ruh ba wat ka Sorkar India bad ki 23 tylli ki jylla bad 8 tylli ki Union Territories ha ka ri India ki ladep ban pynduh ïa ka Personal Interview, hynrei haduh mynta ka Sorkar ka sngap jar jar,” ong u Working President ka KHNAM u Bah Thomas Passah ha u kyrwoh ba la phah sha ki lad pathai khubor.
“Ka jubab jong u Myntri Rangbah mynta ka sngi kam pynhun ïa ngi kum ka seng bad ka khlem pynhun ïa u MLA badonburom u Bah Sungoh lane ïa kiwei kiwei ki Nongmihkhmat jong ka iingdorbar Thawaiñ ka jylla. Katkum ka jubab kaba u Myntri Rangbah u la ai ba 50/50 % la bhah na ka bynta ka Written Test bad ka Personal Interview. 50% ka la plie lad bha ïa ki briew ba don ha ka bor ban tuklar lane mushlia ïa ka ïohkam ïohkam hok jong ki samla,” ong u kyrwoh.
“U Myntri Rangbah u la ong ruh ba la pynlong ïa ka Personal Interview ban peit ruh ïa kiwei kiwei ki jingdonkam ha ki Candidate, ka jingkylli kaba ladei ban kylli ïa u Myntri Rangbah ha Iingdorbar ka long, kiei kita ki jingdonkam kiba hap ban peit tang lyngba ka Personal Interview haba thungkam Sweeper lane kiwei kiwei ki kam Grade04? Ka jingshisha ka long ba ïa ka personal interview donkam tang ha ki jait kam kiba donkam ban peit ïa ka Personality jong u/ka kyrtong,”la bynrap u kyrwoh.
“U Myntri Rangbah u la ong ruh ba ka don ka jingduhnong bad jingïohnong ruh lada ym don personal interview shuh. Ladei ban kylli na u Myntri Rangbah ba kiei kita ki jingduhnong lada pynduh noh ïa ka personal interview, namar kumba ngi la thoh sha ka Sorkar ngi la batai shaikdar ba lada pynduh ïa ka personal interview ka jingïohnong kan long ba kito kiba dei hok ban ïoh kam kin ïoh. Ka por jong ka Sorkar kan ym sepei. Ka pisa ka Sorkar kan ym sepei. Ki samla kiba aplai kam kin ïoh jingkyrmen. Ki briew kiba mlien ban pan pisa ban pynïoh kam kin ym ïohlad shuh ter ter ka jingduhnong lada pynduh personal interview ka long tang ïa kiba don ha ka bor namar kin ym ïohlad shuh ban leh shiliang lane leh politik ïa ka hok jong ki samla,” la ong u Bah Passah.
“U Myntri Rangbah u la ong ruh ba ka Sorkar ka dang peit bniah ïa baroh ki bynta jong ka rukom thungkam bad kan shimpor. Kine baroh ki dei tang ki jubab ban pynjlan ïa kaei kaba la donkam ban leh noh. Ngi tip shai ba ki bynta kiba donkam ha ka jingthung kam Sorkar kadon tang saw tylli kita ki long; ban pyllait Advertisement. Ki samla kin pyndap Form ban aplai. Ban pyllong ïa ki Test bad ban jied ïa kiba la shah jied. Ngi sngewthuh balei u Myntri Rangbah u kwah ban pyni ba ka kam ka long kaba jrong bad ba khongwaiñ bha namar kam long satia kumta,” la kynthoh ka KHNAM.
“Ka seng ka long kaba kloi ban ïathir bad u Myntri Rangbah halor kane ka mat bad lada u jop u Myntri Rangbah ngim ym dawa shuh hynrei lada ka ieng ka nia jong ngi ka Sorkar ruh ka dei ban leh noh mardor ïa kane ka jingthmu babha. Ka Seng kan sa shim ïa la kijong lad ki lynti ban pynthikna ba ka Srkar kan pynduh noh ïa ka personal interview,” la bynrap u kyrwoh.
