Shillong, Nailur 13 : Ka Khasi Students’ Union – Laban Circle ha u kyrwoh na u Samla Jason Laloo General Secretary, KSU Laban Circle ka kwah ban ai ka khubor kaba shai sha ki jaitbynriew Karbi bad kumjuh ruh ia ka Karbi Anglong Autonomous Council (KAAC) bad sha ka Sorkar Assam ba kin sangeh noh shi syndon ia ka jingleh donbor ka jong ki ia ki paradoh parasnam kiba don ha khappud da kaba pyndik na ka por sha ka por da ka jingkyntur pud sha ka jylla Meghalaya, ka jingkhrong khajna beaiñ ia ki kali mar rep jong ki nongshong shnong jong ka jylla, ka jingbyrngem byrsit da ki seng lehnoh ki Karbi bad ka jingleh donbor ki bor pahara bad ki pulit Assam ia ki paid Khasi.
Katkum ki jinglum khubor jong ka Seng la iathuh ba u Myntri Rangbah jong ka Jylla Assam, u Dr. Himanta Biswa Sarma un wan hiar lashai ka sngi u 13 tarik u Nailur 2023 sha Shillong ban plie ia ka Karbi Hemtun House kaba don ha Laban pyrshah ka Pinemount School, Shillong bad ban buh ia u Mawnongrim na bynta ka Hostel ba 100 jingthiah na ka bynta ki samla pule.
“Ka Seng kam shim la pynthud ia ka jingtei jong ka Karbi House hangtei ha Laban, namar ngim shim long ka jaitbynriew kaba bishni bad ban pyndik ia ka jingdonkam jong kiwei pat ki jaitbynriew riewlum namar ngi long ka jaitbynriew kaba Tip Briew Tip Blei, hynrei ha kajuh ka por ngim shim lah ban shu sngap jar lada ki paradoh parasnam ki jong ngi pat ki shah pyndik ha ki paid bynriew Karbi” lah ong ka kyrwoh
Te kumta ka Seng ka maham jur ia ki paid bynriew Karbi bad ka Sorkar Assam ba kam dei ban kyntur pud sha ka jylla Meghalaya bad kam dei satia ban pyndik ia ki Khasi ba sah ha West Jaintia Hills District, lem kumta ka Seng kan shim da ka sienjam ban khang khyrdep ia ka Karbi House ha Laban bad pyndik kumjuh ia ki jaitbynriew Karbi kumba ki pyndik ma ki ia ki Khasi, pynkut ka kyrwoh.
