Shillong, Nailur 13: Ka Joint Action Committee Wapung C&RD Block, kaba kynthup ia ka Dorbar Shnong Wapungskur bad Dorbar Shnong Wapungshnong, ki la pynpaw ia ka jinglyngngoh bad pan jingpynshai na ka sorkar halor ka jingpynkynriah jyndat biang jong ka Sorkar ia ka ophis treikam bashipor jong ka Wapung C&RD Block na Wapungskur sha Khliehriat khlem ki daw kiba biang bad khlem ka jingkynjoh ktien ia ka Joint Action Committee Wapung C&RD Block, ia ka Dorbar Shnong Wapungskur bad ia ka Dorbar Shnong Wapungshnong, kiba la iadon bynta naduh ba sdang bad haduh ba wanrah ia ka Wapung C&RD Block na Khliehriat sha ka thaiñ Wapung.
Ha ka jingshisha kumba long mynta, namar bym pat dep ka jingshna ia ka ophis treikam bapura jong ka Wapung C&RD Block ha ka jaka kaba ka shnong Wapungskur bad shnong Wapungshnong ki la ai sngewbha sha ka Sorkar Jylla, la rah shwa shipor ia ka ophis treikam bashipor jong ka ophis ha kawei ka iing kaba don ha ka shnong Wapungskur ha u Lber, 2022. Naduh utei u snem haduh ka 7 tarik mynta u bnai katei ka ophis ka treikam ha katei ka jaka bad iing ha kaba ai ia ka jingshakri ia u paidbah jong ka block.
Hynrei kyndit ha ka 8 tarik mynta u bnai la lap ba ia kane ka ophis treikam la rah biang sha ka Khliehriat khlem da pyntip sha ka JAC, Wapung C&RD Block lane sha ka Dorbar Shnong Wapungskur bad ka Dorbar Shnong Wapungshnong.
Ha kajuh hi ka sngi ba la rah ia ki tiar ki tar jong ka ophis treikam, ki nongialam jong ka JAC Wapung C&RD Block, ki la pyrshang ban wad ia ka daw da kaba pyrshang ban telephone ia u Block Development Officer (BDO) ba dei peit ia ka Block, hynrei u khlem shim satia ia ka phone bad la wad jingtip biang ruh da kaba kylli lyngba ka whatsapp hynrei ia kata ruh u khlem jubab satia.
Ka JAC ka la pynpaw ka jingpynkynriah ia kane ka ophis treikam sha Khliehriat ka pynsuba jur ba imat ka don kaei re kaei sha lyndet halor kane ka jingleh jong ka sorkar.
Kumta khnang ba ka JAC Wapung C&RD Block, ka Dorbar Shnong Wapungskur bad ka Dorbar Shnong Wapungshnong bad u paidbah kin dup shai kdar, la dawa ba ka sorkar lane kino kino ki bor ba dei peit ia kane, kin hap ban ai ia ka jingpynshai kaba shai kdar halor kaei ka daw ba la rah biang mynta ia ka ophis treikam bashipor jong ka Block sha Khliehriat.
Ka JAC Wapung C&RD Block kan ym shong kli kti da leilei ruh em hynrei kan iai buddien tad haduh ba kane ka kam kan da shai kdar bad ban wanrah biang ia ka ophis treikam bashipor jong ka Wapung C&RD Block ha Wapungskur, ka jaka ha kaba ka ophis treikam ba pura jong ka block kan don katkum ba la pynbna da ka sorkar.
Ia u kyrwoh la pyllait da u Secretary ka JAC Wapung C&RD Block, u Ma Hercules Mutyen, u Waheh Shnong ka Wapungskur u Ma Deolangki Dkhar bad u Waheh Shnong jong ka Wapungshnong u Ma Kduplang Ryngkhlem.
