Shillong, K’lyngkot, 11: Ka Khasi Students’ Union lyngba ka Employment Monitoring Cell ka la aiti da ka dorkhas sha u Director (Corporate Affairs) jong ka Meghalaya Energy Corporation Limited (MeECL) halor ka jingpynslem jong ka MeECL ban thung ïa ka kam Assistant Engineer (Electrical/ Mechanical).
Ïa kane ka post Assistant Engineer (Electrical/Mechanical) la pyndep ïa ka eksamin (written examination) ha ka 13 tarik Naitung, 2019 bad la pynmih ïa ka result ha 19 tarik, Nailar, 2019 ha kaba la jied ïa ki 24 ngut ki ban hap leh ïa ka personal interview ha 26 tarik, Nailur, 2019. Phewse shuwa kata ha u 22 tarik, Nailur 2019 ki la pynpep noh ïa kane ka interview bad la 4 snem tam kim shym la lah shuh ban pynurlong ïa kane ka kam.
Ka Seng haba ïakren bad ki bor pynïaid jong ka MeECL la ïoh jingtip ba ka MeECL kam shym la lah ban thungkam ïano ïano ruh naduh u snem 2020 namar bym don pisa ban siew tulop bad ïa ki post ba kyrkieh ba donkam la shu thung kontrak (contractual basis).
Ka Seng lyngba une u kyrwoh ka buh jingkylli ïa ka Sorkar jylla, khamtam eh ïa ka tnat Bording ba kaei ka sienjam ba ka la shim ban pynbeit ïa ki kynrum kynram ha MeECL bad kumba ka long mynta kaei ka lawei jong ka MeECL.
Ka Seng ka dawa na ka Sorkar jylla ba kadei ban shimkhia halor ka thungkam thungjam ha ka MeECL bad kumjuh ruh ban pyllait ïa ka tulop jong ki nongtrei ka MeECL namar mar ïamih na ka jingïakren la wan poi sa ki jong nongtrei MeECL ban pynsngew sha ka seng ba ym pat pynlait ïa ka tulop ka jong ki.
