Shilong, K’lyngkot, 11: U MDC barim jong ka GHADC na Balachanda u Sofior Rahman ha ka sngi Palei u la kob ïa u Myntri ka tnat PHE u Marcuise N. Marak ban leit jurip ïa baroh ki skhim kiba la pyntrei hapoh ka Jal Jeevan Mission (JJM) ki bynta Rithor jong ka West Garo Hills.
Ka jingkob jong une u MDC barim ka la long hadien ba u Myntri ka tnat PHE u la kyntait war da kaba kam ba ka jingkynnoh ba ka don ka jyrsieh bamsap ka dei tang ka jingpyrshang ban pynlong politik ïa ka jingpyntreikam ïa ka JJM ha Meghalaya shwa ban poi ka elekshon Lok Sabha.
U Rahman dang shen u la ujor sha ka Central Vigilance Commission (CVC) bad dawa ba dei ban thung da ka Independent Inquiry halor ka jingkynnoh bamsap ha ka jingpyntreikam ïa ka skhim JJM ha West Garo Hills.
“Nga nud ban kob khamtam ha ki bynta rithor jong ka West Garo Hills, Meghalaya (kata, ha Phulbari LA Constituency, ha Rajabala LA Constituency bad ha Selsella LA Constituency),” ong u Rahman ha u kyrwoh.
“Kam shym don ka jingleh politik ïa ka JJM bad nga ai ruh ka jingkular bad ngan ai ruh ïa ki sakhi sabut sha u Myntrika tnat PHE ba ka don shi spah na ka shispah ka bamsap haba pyntreikam ïa ka projek ha 47-Rajabala Constituency bad katto katne ki projek ha Selsella LA Constituency bad ha ri thor jong ka West Garo Hills,” u la ong.
“Nga kyrpad ïa u (Marak) ba un pyntip ïa nga lada u mynjur ban leit sorjanmin. Ngan pyni ïa u hangno ka don ka bamsap bad mano ba pyrshang ban kdat ïa ka jingbamsap JJM sha ka politik,” la ong u Rahman bad bynrap, “nga kular ban bud, lada ka FHTC, u main pipeline ba la pynïasoh bad ka jingtrei ka ladep palat ïa ka 30% bad ngan pdiang ïa ka jingshah pynshitom ha ka aiñ.”
U la ong ba u Myntri ka tnat PHE u shu kren tang na kaba ïoh jingthoh na ki ophisar jong ka tnat bad um don jingtip eiei ruh em ïa kaba jia ha kaba ïadei bad ka jingpyntreikam ïa ki skhim hapoh ka JJM ha ki bynta rithor jong ka West Garo Hills.
U Rahman u la ai jingmut ruh ïa u Myntri ba un leit peit hi da lade bad shwa ban ai ïa ka jingkynthoh sha ki lad pathai khubor.
“Lada u kyntait ban leit sorjamin mynta ka taiew ïa ki skhim ba la pyntrei ha rithor bad lada um thung ïa ka Magisterial Inquiry ki paidbah kin tip ba u pyrshang ban leh politik ïa ka skhim JJM bad u pyrshang ban tap eitmiaw ïa ka jyrsieh bamsap hapoh ka tnat PHE, ïa ka Firm lane ïa u Kontraktor ne ïa ka Third Party bad u don bynta ruh ha ka bamsap jong ka skhim JJM. Lada um ïadon bynta eiei u dei ban pdiang ïa ka jingkob jong nga,” la kob u Rahman.
Da kaba ai ïa ka jingtip kaba bniah ïa ki skhim bapher bapher, u Rahman u la ong ba ka jingshna pynheh ïa ka Nekikona Combined WSS Scheme (Scheme Id ka long 8394205) la mang pisa T. 6036.03 lak bad ïa ka pisa ladep siew sha ka Firm ne Contractor T. 5178.71 lak.
