Shillong, Jylliew, 14: Ki nongtrei jong ka tnat Pule Puthi kiba don hapoh ka shatri jong ka All Meghalaya SSA Non-Teaching Staff Association (AMSSANTSA) ki bym hun ïa ka jingkular jong Myntri ka tnat Pule Puthi u Rakkam A. Sangma ha ka jingïakynduh ïa u ha sngi Thohdieng, ki la pynban ban ïaid beit shakhmat ïa ki prokram jingïakhih hadien ba la kut ka jingaipor kaba 15 sngi ïa ka Sorkar Jylla.
Ïa kane la pynbna da u General Secretary ka AMSSANTSA u Bah Barikupar Mylliemngap hadien ka jingïakynduh ïa u Myntri ka tnat Pule Puthi u Rakkam A Sangma ha ka jingïakren bad ki lad pathai khubor.
U Bah Barikupar ula ong ba ha ka jingkynduh, u Myntri u la kular ba ka Sorkar Jylla kan sa shimkhia ïa ki iingdawa jong ki hynrei watla katta ruh um shym ai satia ka jingkular ban leh eiei halor ka jingdawa ban kyntiew ïa ka tulop.
U la ong ba u Myntri ka tnat Pule Puthi u la khot ïakren hadien ba ka Seng ka la aipor 15 sngi ïa ka Sorkar Jylla ban kyntiew noh ïa ka tulop katkum ka jingtyllun jong ka por namar ka jingrem shaba palat ki marbam mardih bad kiwei kiwei ki jingdonkam ba manla ka sngi.
“Ha ka jingïakren u Myntri u la ong ba un sa shimkhia ïa ki jingdawa jong ngi hynrei ngim hun namarba ngi khlem ïoh ïa ka jingkular kaba pynhun mynsiem ïa ngi, namarkata, ngin ïaid beit shakhmat ïa ki prokram jingïakhih hadien ba kut ka jingaipor kaba 15 sngi ïa ka Sorkar Jylla,” la pyntip u Bah Barikupar.
U la ïathuh ruh ba ka AMSSANTA kan shong kyrkieh ïa ka jingïalang jong ka Executive Committee ban shim rai kum kiei ki jingïakhih kiba ka Association kan sa pynbna ha ki sngi ki ban wan.
