Shillong, Risaw 04: Ka Sorkar ka la thaw da ka Komiti ban khot ïakren ha ka taiew ban sa wan ïa ki kynhun bapher bapher kiba don bynta ha ka jingpyntyllun ïa ki kam jngohkai pyrthei kynthup ruh ïa ka kynhun jong ki nongñiah Taxi.
U Myntri ka tnat Jngohkai Pyrthei u Bah Paul Lyngdoh haba pyntip ïa kane ha ka sngi Thohdieng u la ong, “ngi la thaw ïa ka Expert Committee ba la khlieh da u Director ka Tourism. Un sa shong jingïalang bad ki nongïalam jong ki nongñiah Taxi ha ka taiew ban sa wan. Nalor ba ladep khot jingïalang ïa ki kynhun bapher bapher kiba ju pynïaid ki kam jngohkai pyrthei yn sa khot lang ruh ïa ki nongïalam ka Khasi Taxi Drivers Association ha ka taiew ban sa wan.”
Ha kaba ïadei bad ka jingdawa jong ka kynhun ki nongñiah ban pyntreikam ïa ki kyndon kumba leh ha ka jylla Sikkim, u Bah Paul u la ong, “kin dang ïakynduh ha ka jingïalang ha ka taiew ban sa wan. Ynda ki jingïakren ki la tyllun shakhmat, ka Komiti kan sa pynsngew sha nga ïa ki rai ba la shim bad ngan sa peit ba kan ym don kano kano ruh ka jingeh ka bym lah ban pynbeit halor kane ka bynta”
Kane ka rai ka la wan hadien ba ka Sorkar ka la shim rai ban thaw ïa ka Komiti ka ban khmih ïa ki jingeh kiba bun kiba ktah ïa ki nongñiah Tourist Taxi bad wanrah ruh ïa ki jingai jingmut halor kane.
Ka Komiti kan kynthup ïa ki nongmihkhmat na ka tnat Tourism, na ka tnat Aiñ, na ka tnat Pulit, na ki bor synshar district bad kiwei kiwei tnat ba dei peit nalor ki nongmihkhmat na ki kynhun bapher bapher.
Dang shen, ka kynhun ki nongñiah kali kamai Tourist na rilum Khasi ki la maham ba kin pynlong da ka jingshah thngan lada ka Sorkar ka lah ban pynurlong ïa ki jingdawa ban khanglad ïa ki kali kamai Tourist kiba nabar ban kit ïa ki nongjngohkai sha ki jaka jngohka pyrthei kiba don ha ka jylla.
