Shillong, Naiwieng, 13: Ka Central Executive Committee (CEC) jong ka United Democratic Party (UDP) ha ka lah sngi U Blei ka la shim ia ka rai ban bynshet ha ka State Election Committee (SEC) jong ka party ban ia pyrkhat ha kaba iadei bad ka jingiatreilang jong ka UDP bad ka HSPDP hapoh ka lama jong ka Regional Democratic Alliance (RDA) na ka bynta ban sei ia u kyrtong monlang ha ka elekshon Lok Sabha ka ban sa long ha u snemn 2024.
U President jong ka UDP u Bah Metbah Lyngdoh ha ka jingiakren bad ki lad pathai khubor u la iathuh ba ha kaba iadei bad ka Tura Parliamentary Seat, ka Central Executive Committee (CEC) jong ka party ka la rai ban pynkhamti beit ha ka State Election Committee bad ha ki Senior Leader jong ka party ban wad ia u kyrtong ban pyniakhun ha ka elekshon Lok Sabha.
