Shillong, Nailur, 12: Ki nonghikai jong ki skul SSA kiba don hapoh ka shatri jong ka All Meghalaya SSA Schools Teacher’s Association (AMSASTA) ha ryngkat ka jingïatreilang bad ka All Garo Hills SSA Schools Teacher’s Association (AGHSSASTA) ki la byrngem ban pynlong ïa ka jingïakhih kaba khlem pud sngi ha nongbah Shillong lada ka Sorkar Jylla kam pynkiew ïa ka tulop ka jong ki haduh ka 30 tarik u Nailur, 2024.
U General Secretary jong ka All Meghalaya SSA Schools Teacher’s Association u Bah Wanpyndaphi Lapang ha ka jingïakren bad ki lad pathai khubor u la ïathuh ba kine ki ar tylli ki seng jong ki nonghikai skul SSA ki la aiti ruh ïa ka dorkhas ha u Myntri Rangbah ka Jylla u Conrad K. Sangma ha ka sngi Palei ban pynpaw ïa kane ka mat jingdawa ba ka Sorkar kan kyntiew noh ïa ka tulop ka jong ki nonghikai skul SSA kiba don kumba 12 hajar ngut tam ha ka jylla Meghalaya baroh kawei.
U la ïathuh ba ka jingdawa ban kyntiew ïa ka tulop ka long beit haduh 100 percent.
“Ka jingdawa ban pynkiew ïa ka tulop jong ngi ki nonghikai skul SSA ka dei kaba la slem bha naduh u snem 2016 hynrei kat haduh mynta ka Sorkar ka sngap manman khlem da ïoh ïa kano kano ka jubab na ka Sorkar Jylla,” u la ong.
“Ngin ai por ïa ka Sorkar Jylla haduh ka 30 tarik mynta u bnai ba kan kyntiew ïa ka tulop hynrei lada ka Sorkar kam sngap ïa kane ka jingdawa, ki nonghikai skul SSA na rilum Khasi, Jaiñtia bad Garo ki long kiba la pynkhreh ban pynlong da ka jingïakhih kaba khlem pud sngi ha nongbah Shillong,” la bynrap u Bah Lapang.
