Khliehriat, Naiwieng, 28: Ka Dorbar Shnong Umkiang, ka la pynpaw ia ka jingsngewbynniaw halor ka jingbym shimkhia jong ka Sorkar na ka bynta ban pynbha ia ka surok National Highway-6 ha ka thaiñ Umkiang, East Jaiñtia Hills District, naduh Umkiang Pyrtakuna Kuliang, Dona bad ka thain khappud Narpuh baroh kawei.
“Ka jingbym shimkhia jong ka Sorkar ban bthah ia ka NHAI/NHIDLC ban pynbha ia ka surok National Highway-6 ka la pynlong ia ki nongshong shnong ban ioh pang haba ring mynsiem khamtam ki khynnah khyllung ha kine ki bnai tlang. Ki paitbah nongshong shnong kiba sah ha shilynter jong ka surok kim lah shuh ban pynkhreh ia ka jinglehkmen Christmas namar ym long shuh ban ai rong ne pynbha pynitynnad ia ki iing ki sem na ka daw ka jingjur palat u pum pum,” la ong u kyrwoh ba la phah da u Waheh Shnong ka shnong Umkiang u Bah Lasting Pala bad u Secretary Shnong u Bah Nicholas Lyngdoh.
“Ha ka jingshisha ka don ka kompeni Laxmi na Silchar kaba wan trei teng teng malu mala bad kaba trei tang dep rukom bad ka khlem lah ban pynbha kumba dei ban leh. Haba ki nongialam shnong ki kylli balei kim trei bha ia ka surok, ka jubab ka long pynban ba kim ioh pisa na ka Sorkar,” la ong u kyrwoh.
Kane ka jingbym kheiñ snep jong ka Sorkar Meghalaya/NHIDCL ban shna pynbha ia ka surok ka la pynkordit ia ki nongleit nongwan bad ia ki nongshong shnong namar ki hap ban sait ia ki pliang shwa ban bam jingbam na ka daw ka jingsop da u pumpum nalor ka jingbun ki Kali heh/ barit kiba iaid 24 kynta, la bynrap u kyrwoh.
Ka Dorbar Shnong Umkiang ka la maham ruh lada ka Sorkar Meghalaya kam sngap ia ka jingud jong ki paitbah nongshong shnong ka thain Umkiang ban pynbha ia ka surok NH-6 ha kine ki sngi kin pynlong da ka jingiakhih da kaba mih paidbah sha surok.
