Shillong, Naitung, 04: Ka seng kieng atiar Hynñiewtrep National Liberation Council (HNLC) ba la shah kheiñ be-aiñ ha ka Sorkar ha ka sngi Palei ka la maham tyngeh ïa u Chief Executive Member (CEM) jong ka Khasi Hills Autonomous District Council (KHADC) ban pyndam noh mardor ïa ka jingpynbna (Notification) ba la pynbna Raid ïa ka shnong Majai.
“Ka jingpynshai jong u Bah Pynïaid Syiem ha ki lad pathai khubor ka dei tang ka jingïalam bakla. Haba ka tyngab ka kyntait ban pynhap shilyngkhot ka doh na ka shyntur jong ka, u myrsiang da ka jingshalak u ong ïa ka, “ynda wan u slap bad kan don ka jingshlei um, hangno phin riehtngen? Phin sa ïap lada phi shong sah hangto halor u dieng,” ong u kyrwoh ba la phah da u General Secretary-cum-Publicity Secretary ka HNLC u Bah Saiñkupar Nongtraw.
“Phi ju mlien ban thok, bad baroh ki riewsaiñpyrthei ki ju long kumta. Kaba sngewsih ka long ba ki paidbah ki wad ïa ka hok na ki katto katne ki nongkam bymman kiba pynlo ng ïa ki briew jong ngi ban duk tasam. Ka Sorkar NPP, la ha KHADC bad ha ka Jylla, ki pynlong ïa ki paidbah ka shnong Sohra ban ïakynduh jingeh na ka jingthngan bad pynkylla khongpong ïa ka jingim jong ki. Ha ka jaka ban kyntiew ïa ka Sohra sha ka District, la khang khyrdep pynban ïa ka MCCL bad la pyrshang ban pynlong ïa ki paidbah jong ngi kiba khlem kam khlem jam bad ki nongshong shnong bym larkam,” la kynthoh ka seng.
“Ka HNLC ka maham ïa u CEM ba u dei ban pyndam noh mardor ïa ka jingpynbna (Notification) ba la pynmih dang shen ban pynlong ïa ka shnong Majai kum ka Raid, hynrei lym kumta. Ïa ka shnong Majai la bat lakam da ki heh saipan jong ki bar jylla bad ki ‘Ingkhong shyllangmat’. Ka jingpynmih dang shen ïa ka jingpynbna ka la pynkmen haduh katta katta ïa ki bar jylla kiba sah ha Majai, kiba la leh kmen da kaba thang bom pakata bad ka shad ka kmen,” ong shuh shuh u kyrwoh.
“Ki paidbah Hynñiewtrep ki la ngiah ïa ki jingshukor ki riewsaiñ pyrthei bad ka jingthok ka Sorkar. Ki samla ki kwah ban ieng ha la ki jong ki kjat bad ban weng ruh ïa la ki jong ki jingeh, hynrei ka Sorkar ba ïalam da ka NPP ka knieh noh ïa ki kam jong ki bad ki kam barit baria, da kaba pynkupbor ïa ki bar jylla ha ka khih ka kamai. Ka jingkhang khyrdep ïa ka karkhana dewbilat bad ka jingkhang ïa ki kam khaii barit da kaba die shyiap bad maw ka la ktah ïa ka khih ka kamai. Wat hapdeng ka jingïakhun da ka Hima bad u Syiem ban ïarap da kaba ailad ïa ka jingkhaii mawshun sha Bangladesh, ka KHADC ka wad ïa ki lad ki lynti ban ai jingkyrshan ïa ki nongkhaii bar jylla,” la kynnoh ka HNLC.
“Bun na ki samla jong ngi kim donkam donjam watla ki don ïa ka kyrdan pule kaba heh, namarba ka Sorkar kam shym la lah ban plie ïa ki lad aikam na ka bynta jong ki. Ka pule puthi ha kane ka ri ka dei kaba ïaleh pyrshah dalade. Ka dei ka pule puthi bymman namarba phi siew bad phi pynlut ha kaei kaei kaba phim lah ban pyndonkam pat hadien. Namarkata, bun na ki samla ki leh ïa ki kam khaii drok namarba kam don ka lad ka kabu kaba plie ïa ka ïohkam ïohjam. Ki samla ki pep skul noh shiteng por bad ki phai sha ka jingim ban leh kam bymman. Ka pule puthi ha kane ka ri ka pynmih kham bun kiba biej ban ïa ki bastad.
“Lada ki samla ki ïakhih na ka bynta ka hok, ka Sorkar ka khot ïa ki da ki nongpynkulmar shnong bad ki nongïaleh pyrshah. Ki pyrshang ban pynjot ïa ka lawei jong ki samla jong ngi, kaba syriem ïa ka jingïakhih ha Tiananmen Square protest ha China. Hato phi kwah ban ïohi ïa ka jingisih bad ka jingïaumsnam ha Sohra bad ha ka Bri u Hynñiewtrep baroh kawei? Hato phi kwah ba ngin hikai ïa ka jingisih bad ka jingïaumsnam ïa ki samla kumba leh ka RSS bad ka BJP ki hikai ïa ka jingisih bad ka jingïaumsnam ban thang ïa ki kot bakhuid jong kiwei ki jaitniam, ki ingmane bad ki skul? Wat pynbor ïa ngi ban hikai ïa ka jingisih. Wat iehnoh ïa ki samla jong ngi ha Sohra ha ka jingmong. Nga maham ïa phi bad ïa ka Sokar ba kan ym don kano kano ka bor kaba lah ban khñiot noh ïa ka mynsiem jong ki bad phim don ruh ka suloi heh ban pynïap ïa ki,” la ong shuh shuh u kyrwoh.
