Shillong, Rymphang, 15: KaJoint Action Committee (JAC) jong ka dong Namchiang, Elaka Narpuh, East Jaintia Hills District, ba la lamkhmat da u Waheh Shnong jong ka shnong Umkiang kum u Chairman bad u Waheh Shnong ka shnong Pyrtakuna kum u Secretary ryngkat ka jingsynran lang jong kiwei ki riew rangbah bad ki nongialam shnong ha ka sngi Palei ki la aiti da ka jingthoh ha u Symbud Myntri Rangbah ka Jylla uba khmih ia ka tnat PWD (Roads) Bah Pretone Tyngsong ban dawa ia ka sorkar ba ka dei ban shna noh mardor ia ka surok National Highway-6.
Ka JAC ka la aipor 10 haduh 12 sngi ia ka Sorkar Jylla ban shna noh ia kane ka surok kaba la pyrsyrtok haduh katta katta ia ka leit ka wan bad ka rah ka rong jong ki paidbah ka East Jaiñtia Hills District.
Ka JAC ka la maham ruh ba kan pynlong da ka jingpakhang surok kaba 24 kynta hapoh ka Dong Namchiang, kata naduh ka shnong Tongseng shaduh Umkiang Ratacherra Malidor haduh khappud Assam, lada ka Sorkar kam lah ban shna noh mardor ia kane ka surok, la iathuh u Chairman ka JAC Bah Lasting Pala bad u Secretary Bah Love You Bareh.
Kum ban shu pyntip hangne, ha ka 25 tarik, Nailur 2023, ki paidbah kiba la ai jingkyrshan ia ka KSU East Jaiñtia Hills District ki la pynlehrain ia ka National Highway Authority of India (NHAI) da kaba leh mynleh khwai dohkha hapdeng ka surokbah NH-6 kaba la dap da ki thliew ki syar namar ka jingjot rathai jong kane ka surok kaba la pynsyrtok haduh katta katta ia ki paidbah.
Ki paidbah bad ki dkhot jong ka KSU ki la pynlong ruh ia ka jingiakhih da kaba thiah hapdeng surok kum ka jingpyrshah ia ka jingleh mynthi jong ka NHAI halor ka jingdawa jong ki paidbah ban shna pynbha ia kane ka surok.
