Shillong, Rymphang, 15: Ka Khun Hynñiewtrep National Awakening Movement (KHNAM) ha ka sngi Palei ka la dawa ia ka Sorkar Jylla ba ka dei ban pynduh noh ïa ka ‘Personal Interview’ ha kaba iadei bad ka jingpynrung kam ha ka Group-B, Group-C bad Group-D ha ki tnat treikam bapher bapher jong ka Sorkar Jylla.
Ki nongialam ka seng ki la pynlong ruh da ka jingteh ia ki banner hakhmat u durmot jong u Kiang Nangbah kum ka dak ban pynsngew ia kane ka jingdawa sha ki tyndong skhor jong ka Sorkar MDA-2 ba ialam da ka NPP.
Ha ka jingiakren bad ki lad pathai khubor, u Working President jong ka KHNAM u Bah Thomas Passah u la ong ba la shi snem mynta ka seng ka la phah ia ka jingthoh sha ka Sorkar ban kyrpad ba kadei ban pynduh noh ia ka ‘Personal Interview’ kaba pynlong ia ka jingthungkam na ka bynta ki post ha ka Group-B, Group-C bad Group-D ha ki tnat treikam bapher bapher ka sorkar jylla hynrei ka Sorkar kam shym la sngap satia ia kane ka jingdawa jong ka seng.
U la ong ruh ba Sorkar India naduh u snem 2016 ka ladep ban pynduh ia ka ‘Personal Interview’ ha ki 23 tylli ki jylla ka ri India hynrei kaba lyngngoh ka long ba ka Sorkar Meghalaya kam pat lah satia ban bud ia kane ka nuksa ba la leh da ka Sorkar India.
Haba pynksan ia kane ka jingdawa, u Bah Passah u la ong ba ka jingdawa jong ka seng ban pynduh noh ia ka ‘Personal Interview’ ka long ban wanrah ia ka rukom thungkam thungjam kaba khuid bad suba bad kaba bym don jingiashah liang ha kaba ki nongthep kam kim dei satia ban wad jingiarap na ki riewsaiñ ban ioh ia ka kam kaba ki la aplai.
