Shillong, Nailur, 28: U nongïalam jong ka kynhun ïada masi ba la lamkhmat da u Pujyapad Shankaracharya u la byrngem ban mudui sha Ingbishar Supreme Court pyrshah ïa ki bor ba dei peit ka kad liengsuiñ namar ka jingbym ai jingbit ïa ka liengsuiñ ban mih na kad liengsuiñ Agartala ban wan sha Shillong Airport ha ka sngi Saitjaiñ.
Tang ha ka por janmiet, ka video ka la saphriang ha ka social media ba u Pujyapad Shankaracharya u la shu kaweh da i lama masi da kaba shong ha ka liengsuiñ kaba dang her ha ka kynjang kaba 21 hajar phut ha ki lyoh jong ka jylla Meghalaya namarba ka jingbym ai jingbit jong ki bor pynïaid ka kad liengsuiñ Shillong ban wan sha Meghalaya ha kane ka sngi.
Kane ka la jia hadien ba ka Sorkar Jylla ka kyrpad ïa ki bor pynïaid jong ka Airport Authority of India (AAI) ban ym shah hiar khyndew ïa ka liengsuiñ kaba kit ïa ka kynhun ïada masi ban hiar ha Shillong Airport da kaba ai daw ba kan mih ka jingkulmar ha Meghalaya.
“…namar ki katto katne ki jinglong jingman kiba lah ban ktah ïa ka suk ka saiñ ha Meghalaya kumba la pyntip da ki bor synshar district bad kumjuh da u Airport Director ka Kad Liengsuiñ Shillong, ka jingmih jong ka liengsuiñ kaba khlem buh por na Agartala sha Shillong yn ym shah satia,” ong ka tyllong khubor.
Ka jingbym ai jingbit ka la pynlong ïa kane ka kynhun ban pep noh na ka jingwan sha Shillong. Ka jingthmu jong u Pujyapad Shankaracharya ban wan sha Shillong ka long ban pynphriang ïa ka khubor ban ñiew beaiñ ïa ka jingshoh doh ïa ka masi. Kum ka jingpyrshah kaba jur, ki sengbhalang ki la ap triang habar jong ka Shillong Airport ban pyrshah ïa ka jingwan iuhkjat jong u Pujyapad Shankaracharya.
U nongaiktien jong ka kynhun, u Raja Saksham Singh Yogi u la ong, “ngin leit phai biang sha Guwahati (na Agartala) hynrei ngin ban leh katkum ka aiñ pyrshah ïa ki bor pynïaid jong ki kad liengsuiñ. Shen ngin sa ïasyllok bad ki nongsaid aiñ ban mudui da ka mukotduma pyrshah ïa ki bor pynïaid jong ka Shillong bad Agartala Airport.”
“Ngi la leit phai biang sha Guwahati namarba ngim kwah ban pynmih ïa kino kino ki jingjia kiba ktah ïa ka shongsuk shongsaiñ. Hynrei ngin sa ujor da ka mukotduma ha Ingbishar,” u la bynrap.
Haba kylli, u Yogi u ong, “ngi wan da ka jingsuk tang ban shu ïasam ïa ka jingsngew jong ngi hynrei ym ban pynthud ïano ïano ruh.”
Ha ka sngi Thohdieng, ka Sorkar Meghalaya ka la phah da ka jingthoh sha ka Airport Authority of India (AAI) ban ym ailad ïa ka liengsuiñ kaba kit ïa ki nongïalam ka niam Hindu ban hiar khyndew ha Shillong Airport ha ka sngi Saitjaiñ.
Ïa kane ka rai la shim ha ka High-Level Meeting ba la khlieh da u Chief Secretary u Bah Donald P. Wahlang.
Ki bor synshar jong ka East Khasi Hills bad ka Ri Bhoi ki la pynjari da ka Section 163 jong ka BNSS ban mana ïa ka jingpynlong ïa kino kino ki jingïaid paidbah ban ïada masi.
Ha kajuh ka por, ka Central Puja Committee (CPC) ruh ka la kren da kaba shai ba kam ai jingkyrshan satia ïa ka kynhun ïada masi bad ong ruh ba ka jingthmu ban pynlong ïa ka jingïaid paidbah ka long ban pynbna ïa ka masi kum ka kmie jong ka ri ha nongbah Shillong ha ka 2 tarik, Risaw.
