Shillong, K’lyngkot, 25: U State President ka BJP Meghalaya Pradesh u Wankitbok Pohshna u la pynphai nia ïa ka jingkren laplah jong u President ka Meghalaya Pradesh Congress Committee (MPCC) u Bah Vincent H. Pala uba dei ruh u MP ka Lok Sabha na Shillong da kaba ong ba ka long kaba sngewlyngoh ba ka Congress ka hikai pynban ïa ka BJP halor ka jinglaitluid ban mane Blei.
“Katba dei hi ka seng Congress hapoh ka jingïalam jong u Nehru kaba la wanrah nyngkong eh ïa ka aiñ rew kaba la tip kum ka Indian conversion (regulation and registration) Bill ha u snem 1954, kaba la thmu ban pynlong aiñ ha kaba ïadei bad ka “jingai jingbit ïa ki nongïalap bad ka jingpyntip sha ka Sorkar haba don ka jingkylla niam. Ïa kane ka aiñ-rew la kyntait noh da ka Lok Sabha ha kato ki snem bad la sngewlyngoh ba kat u President ka MPCC um tip ïa kata bad ka pawshai ba une u nongmihkhmat u kwah tang ban pynsaphriang ïa ki khubor shukor bad ki bym don nongrim tang ban myntoi lade,” la kynthoh u Bah Pohshna.
“Dang shen u Myntri Rangbahduh ka ri u Narendra Modi u dang shu dep lum ïa ki nongïalam jong ki Niam Khristan kiba pawkhmat ha ka ri kum ka dak ban ïaleh kmen lang ha ka sngi Khrismas kaba dei ka sngi khraw jong baroh ki Khristan ha satlak pyrthei bad ha ka jingkren jong u Modi u la bynrap ba ka sngi Khristmas kam dei tang ka sngi lehkmen jong ki Khristan hynrei ka dei ka sngi bakhraw ïa baroh ki nongshong shnong hapoh ka ri India bad u la pynkynmmaw halor ka jingïajan jong u bad ki kynhun Balang mynba u dang long u Myntri Rangbah ka jylla Gujarat bad khlem da klet u Modi ha u snem 2021 por ba ula leit ban ïakynduh ïa u Kpa Bakhuid Pope Francis ha Rome u la khot sngewbha ïa u Pope Francis ban wan jngoh ïa ka ri India kum u nongshahkhot sngewbha (national guest),” la ong u Bah Pohshna.
“Kam don ka jingartatien ba baroh ki prokram ba la wanlam da ka Sorkar u Modi ki long ki bym shah liang ïano ïano bad ki Khristan ki ïoh ïa ka bhah kumjuh kumba ïohlang kiwei kaba pawshai ba ka BJP kadei kaba khmih lut ïa baroh khlem kano kano ka jingpynïapher. U Modi u ïalap ïa ki kyntien hindi ‘sabka saath sabka vikas saka prayas sabka vishwas’ kaba mut ka jingmyntoi ïa barohlang da ka jingshniah bad ka party BJP kam ju pyndonkam ïa ki ritpaid tang ban myntoi por elekshon kumba ka seng Congress ka ju mlien haduh mynta mynne ban pynsngewbha tang nalor nalor ïa ki ritpaid ban jop elekshon,” la ong shuh shuh u nongïalam ka BJP.
“Ha jaka ba u khlieh ka seng Congress un pynlut por ban pynsaphriang ïa ki khubor lamler u dei ban sei madan pynban ïa ki kam kiba ula leh kum u nongmihkhmat na Shillong Constituency ha jaka ban pynthohbria ïa kiwei ki seng tang ban ïoh jingmyntoi ïalade ha kane ka elekshon MP ban sa wan. Ka ri India ka la kiew shakhmat ha kine ki khyndai snem shiteng jong ka Sorkar u Modi bad manla uwei pa uwei u nongshong shnong ha ka ri ki la lah ban put turoi ba ki long mynta kita ki nongrahktien jong ka ri India ba la kiew ha ka roi ka par bad kam slem shuh ban ngin sa ïoh ban kheit ïa uta u soh ym shuh kum ha ki por ba synshar ka Congress ba ka ri ka la sahdien shaba palat,” ula ong.
“Ka jylla Meghalaya kaba don bun ki Khristan ka ïoh bhah na baroh ki skhim kiba u Modi ula wanrah, kum ka umdih ha manla ki thliew iing kum ka JJM, ka iing na ka bynta kiba jynjar lyngba ka PMAY, ka jingpynïoh tyndong lyer shet lyngba ka Ujwala, u khaw sha ki longing bajynjar lyngba ka PMGKY bad kaba kham kongsan ka jinglah ban ai ïa ka tika Covid kaba la pynlait ïa ngi baroh na ka khlam bad ki don shibun kiei kiei kiba la wanlam da ka Sorkar BJP kiba kum u MP u dei ban tip,” la ong ka BJP ïa u President ka MPCC.
“Ka jingïohbhah ki paid riewlum na ka mang tyngka ka la kot sha ka 89000 klur tyngka ha kine ki khyndai snem shiteng jong ka synshar u Modi katba ha ki snem ba dang synshar ka Congress tang shipawa na katei ka song ruh ki khlem lah ban ai kaba paw ba hynriewphew snem kynthih ka seng Congress ka la lehbeiñ ïa ki paid riewlum da kaba pynduh ïa ki bhah badonkam ban kyntiew ïa ka jingim jong ki. U heh ka seng congress um dei ban klet ïa ki kyntien kiba u Rajiv Gandhi ba la khlad u ju kren’ ba na ka shi tyngka kaba mih na Delhi tang Khatsan naïa ka poi sha ki jylla ïa kaba ka seng BJP ka la lah ban tehlakam ïa ka kam bamsap bad ban pyntikna ba ka hok ki paidbah kan poi shispah na ka shispah sha ki’ la bynrap u Bah Pohshna.
