Shillong, K’lyngkot, 25: Ka Inspector Aniosca Basaïawmoit kaba long ka Senior Instructor ha Central Training Institute of Civil Defence and Home Guards, Meghalaya, Mawdiangdiang ka la shah pynkup burom da ka khusnam Medal for Meritorious Service (MSM) ha ka jingrakhe ïa ka Republic Day ba 75 snem jong ka ri India.
Ka Inspector Basaïawmoit ka dei ka kynthei banyngkong eh na ka tnat Civil Defence and Home Guards ha ka jylla ban ïoh pdiang ïa kane ka Meritorious Service Medal, ong u Divisional Commandant of Home Guards, Shillong Bah PH Shylla ha u kyrwoh ba la phah sha ki lad pathai khubor.
Ka Ministry of Home Affairs dang shen ka la pynmih saw tylli ki Medal, ar tylli na ka bynta ka Gallantry bad ar tylli na ka bynta ka Service ïa kaba la ai sha baroh ki dkhot jong ka CAPF, State Police, Civil Defence & Home Guards, RPF, Correctional Services, Fire Service bad kiwei kiwei.
La bujli ïa kine ki saw tylli ki Medal na ki medal barim kum ka Home Guards and Civil Defence Medal for Meritorious Service bad ka Police Medal for Meritorious Service etc.
