Shillong, Risaw 04: Ka Meghalaya State Planning Board (MSPB) ha ka sngi thohdieng ka la shong jingïalang ban ïathir ïatai ha kaba ïadei bad ka jingjur shaba palat ka jingdheng kali ha nongbah Shillong kaba la pynsohsat haduh katta katta ïa ka leit ka wan jong ki paidbah.
Ha ka jingïalang ba la pynïaid da u Chairman ka MSPB u Bah Metbah Lyngdoh, u Commissioner & Secretary jong ka tnat PWD (Roads) kynthup ki nongmihkhmat na ka National Highways and Infrastructure Development Corporation Limited bad na ka tnat Transports ki la ai ïa ka jingshai kaba bniah ha kaba ïadei bad ki lad ki lynti kumno ban weng ïa ka jingdheng kali ha nongbah Shillong.
Ki dkhot jong ka Board ki la ai ruh la ki jong ki jingmut namar ka jingbun shaba palat ka jingdon jong ki kali saw shaka bad ki thuk thuk ar shaka kiba la rejistar ha East Khasi Hills District.
Ha ka jingïathir, la pyntip ruh ba palat shiphew hajar tylli ki kali saw shaka bad palat khat hynñiew hajar tylli ki thuk thuk ar shaka kiba rejistar tang ha u snem 2023.
Ka la mih ruh ka jingai jingmut ba kawei pa kawei ka longing dei ban ai jingbit ban don tang ar tylli ki kali kumba la leh sha kiwei pat ki ri, ban pyntreikam biang ïa ki Odd bad Even Numbers ha ki jaka ba kham jur ka jingdheng kali, ba ki longing kiba thied kali ki dei ban pynthikna ruh ba ki hap ban don ïa ka jaka pynieng kali.
Nalor kata, ka la mih ka jingtyrwa na ka tnat PWD (Roads) jong ka Sorkar Jylla ban shna noh da ka surok National Highway na Umshyrpi bad ïa ka surok Fly Over kaba pynïasoh shaduh Barik Point.
Khnang ban khanglad ïa ka jingrung jong ki Bos kamai kiba ju kit ïa ki nongleit jingleit shabar ka jylla, ka la mih ka jingai jingmut ban shna sa kawei ka Inter State Bus Terminus (ISBT) shabar ka nongbah Shillong khnang ba ki Bos kamai kin ym wan rung shuh sha nongbah Shillong.
Shuh shuh la ai jingmut ban wanrah noh da ki Online Taxi, ban shna ïa ki jaka kyntiew bad pynhiar ïa ki nongleit jingleit.
Kawei na ki jingïakren ha kane jingïalang ka long halor ka jingduna nongtrei hapoh ka tnat Pulit pynïaid kali ha ka nongbah Shillong.
Ka tnat Urban Affairs, PWD (Roads), Transport bad Police ki la pyni ruh ïa ki jingai jingmut ha kaba la bthah ba kin aiti sha ka Planning Board ba kan bishar bad ban phah ïa ka jingai jingmut sha ka Sorkar Jylla.
