Khliehriat, ïaïong, 26: Khyndiat sngi hadien ba ki shipai Border Security Force (BSF) ki la shoh bad kawut lathi haduh ban da mynsaw ïa ki riew paidbah bad pynjulor ruh ïa ki kali ha East Jaiñtia Hills, ha ka sngi Thohdieng ki dkhot jong ka Khasi Student Union (KSU) East Jaiñtia Hills District Unit ryngkat ka jingsynran lang jong ki Waheh Shnong ki la tur sha ka ktem jong ki shipai BSF kaba don ha Sonapur.
Ki Waheh Shnong, ki dkhot ka KSU, kynthup ïa ki riewpaidbah na ki shnong bapher bapher jong ka East Jaiñtia Hills ki la mih paidbah ban pynpaw ïa ka jingpyrshah halor ka jingthombor jong ki shipai BSF pyrshah ïa kiba luilui kiba dei ki nongshong shnong jong ka thaiñ Narpuh.
Katba ki Waheh Shnong, ki dkhot ka KSU bad ki paidbah ki dang tur sha ka jaka ba don ka ktem ki shipai BSF ki Pulit ki la wan poi ha kane ka jaka ban tem ioh ka mih kano kano ka jingkulmar.
Ki Pulit ki la pynsngewthuh ïa ki Waheh Shnong bad ïa ki dkhot ka KSU ban ym thaw jingkulmar.
Ka jingïakhih jong ka KSU ka long halor ka nongrim ba ki shipai BSF ki sah beain ha kane ka jaka ha Sonapur bad nalor kata ki pyndik ïa ki Khasi-Pnar kiba sah ha ka thaiñ Narpuh da kaba talasi ïa ki kali, da kaba bom lathi ïa ki paidbah.
Shwa ba ka KSU kan pynlong ïa ka jingïakhih ka la mih ka thma ktien hapdeng ki Waheh Shnong bad ki Pulit ha kaba ki la ther tyngeh ïa ka jingkhie wahleng jong ki shipai BSF.
U Waheh shong jong ka Shnong Sonapyrdi u Bah E. Lamare u la ong ba ki shipai BSF kim shym la ioh ïa ka jingbit na ka Dorbar Shnong ban buh ïa ka ktem hapoh u pud u sam jong ka shnong.
