Shillong, Rymphang, 05: U Myntri Rangbah ka Jylla u Conrad K. Sangma, ha ka Lah Sngi u Blei ka la pynkup burom ia ki nongialehkai sports kiba la ioh khur takma ha ka Meghalaya Games 2024 bad kumjuh ruh ia ka kynhun ialehkai phutbol ka Jylla Meghalaya kiba la ioh khur ia ka takma ksiar dang shen ha ka Khelo India Youth Games 2024.
Ha ka jingialanag kaba la long ha U Soso Tham Auditorium, Shillong, la sakhi lang da u Myntri ka tnat Sports and Youth Affairs u Bah Shakliar Warjri, ka Myntri ka tnat Health & Family Welfare ka Dr. Ampareen Lyngdoh, ka Director jong ka Sports and Youth Affairs ka Kong Isawanda Laloo bad kiwei kiwei.
Haba kren kum u Kongsan ha kane ka sngi, u Myntri Rangbah u la ai khublei ia ki nongialehkai sports kiba la ioh ia ka jingjop bad kiba la wanrah ia ka nam ka burom sha ka jylla Meghalaya.
“Kane ka taiew ka long kaba kongsan bad baroh shitaiew ngin ia rakhe lang bad ki samla ha ka jingialehkai sports, ki nongsengkam lajong, ki nongput nongtem bad manla ki kam ba ngi don baroh shitaiew kiba iadei bad ki samla,” u la ong.
U la iathuh ba ka jingpynkup burom bad ka jingai jingithuh ia ka jingjop jong ki samla ka long ban kyntiew ia ki kum ki khlur bad ki nongai mynsiem ia kiwei pat.
“Nga kwah ban ong ia ki samla kiba don hangne ba phi long kiba kongsan tam bad phi don ka jingkitkhlieh bad kam dei eh tang ban ioh ia ka takma ne ban ioh khusnam hynrei ban long ki nuksa babha ia kiwei pat,” u la ong.
U Myntri Rangbah u la pynpaw ruh ka jingsngewnguh ia ka Meghalaya Sports Olympic Association (MSOA), ia ki kynhun ialehkai sports bapher bapher bad ia ka tnat Sports kiba la noh la u synniang u bynhei ban pynlong ia ka lympung ialehkai Meghalaya Games kaba jop.
“Ki don ki jingtynjuh hynrei manla u snem ngi pynthikna ba ka jingialehkai kan kham bha bad ngin jop ruh ia ki jingeh jingtynjuh kiba shah hakhmat,” u la bynrap.
Haba ai khublei ia ka kynhun ialehkai phutbol kaba la long ka lahduh ha ka Khelo India Youth Games u Myntri Rangbah u la ong ba kane ka kynhun ka la pynlong ka jingsarong ia ka jylla bad bynrap, “ki la long ki Lahduh bad kane ka pyni ia ka sap ka phong kaba ngi don bad kaba ki lah ban kynjoh sha ka thong lada ngi long kiba kut jingmut bad kiba buh hakhmat ia ka thong,” u la ong.
Shwa kane, u Bah Shakliar Warjri u la pynkynmaw ia ki nongialehkai ba kin pyndonkam ia ka khusnam pisa da ka jingstad khnang ba kin nang lah shuh shuh ban pynpaw ia ka sap ka phong ha ka jinglehkai sports.
“Ka sorkar ka la ai jingithuh ia ka jingtrei shitom jong phi ban jop ia ka takma hynrei kane kam pat dei satia kaba jingkut. Buh ia ka thong ban kynjoh kham shajrong namarba phi long ka lawei jong ka jylla jong ngi,’ u la ong.
