Shillong, Rymphang, 7: Ki doktor AYUSH kiba don hapoh ka shatri jong ka AYUSH Medical Association of Meghalaya (AMAM) ka la pynlong ia ka jingiakhih lyngba ka Social Media ban pynpaw ia ka jingpyrshah halor ka jingbym sngap jong ka Sorkar Jylla ia ki jingeh ba iakynduh.
Ha u kyrwoh ba la phah da u President ka AMAM, u Dr. A. Lyngdoh u la ong, “ka Association ka la pynlong ia ki jingiakhih lyngba ka Social Media da kaba buh ia ki slogan, ki jingthoh na ki kotkhubor bad ia ki ishu bym pat lah ban weng jong ka AYUSH Department ha ka jylla.”
U Dr. Lyngdoh u la iathuh ba ka Directorate of Health Services (DHS) ka la khot iakren ia ka Association halor ki mat kiba iadei bad ki doktor AYUSH ha ka jylla bad ka mat kaba kongsan tam ha ka jingiakren ka long halor ka jingpyntreikam ia ka Service Rule jong ki doktor AYUSH kiba shakri ha ki hospital sorkar.
“Namar ka jingbym kitkhia ia ka Service Rule haduh mynta ym shym la pynrung ia ki doktor AYUSH kiba dei shakri Sorkar,” u la ong.
“Kane ka mat ka dei kaba la pyntlot ha kaba iadei bad ka jingthungkam ia ki doktor AYUSH ha ka kam sorkar, bad ba ka por ka la donkam ban thung kam bun ki nongtrei na ka bynta ban pynkha ia ka Directorate of AYUSH (kumba la mih ha ki lad pathai khubor bun bunsien),” la bynrap u Dr. Lyngdoh.
“Ka ophis (DHS) la kular ruh ia ka Association ba ka tnat kan sa peit halor ka jingpyntreikam ia ka Service Rule hapoh kane ka taiew bad kular ruh ba ia kane ka kam yn sa rah ban iakren bad ki bor bahalor ha ki taiew ban sa wan,” la iathuh u Dr. Lyngdoh.
Ka Assocation ka la kynthoh ruh ia ka jingbym patiaw jong ka ophis ka Myntri ka Koit ka Khiah ka Sorkar Jylla halor ka jingeh jong ki doktor AYUSH kiba dei ki nongtrei jong ka tnat ka Koit ka Khiah. “Wat hapdeng ki jingiai kyrpad ban khot iakynduh, hynrei kam shym la don kano kano ka jingai jubah,” la kynnoh ka Association.
Ka Association ka kyntu ia ka Myntri ka Koit ka Khiah ka Dr Ampareen Lyngdoh ba kan pyllait por ban khot iakren ia ki jingeh ba ki doktor AYUSH ki iakynduh lane ka Associaition kam don lad shuh da kumwei pat sa tang ban shu pynlong da ka jingiakhih da kaba mih sha surok.
“Ka Association ka la rai ban iai bteng ia ka Social Media Protest bad kyntu ruh ia baroh ki doktor AYUSH bad ia ki paidbah ban pyrshah ia ka jingleh meinah jong ka Sorkar ia ka rukom sumar AYUSH hapoh ka jylla,” la pynkut u kyrwoh.
