Shillong, Rymphang, 7: Ïa ka met ba dang sah jong u Bah Marshall Marwein la tep donburom ha ka sngi Balang da ka jingïam paitdohnud jong ki bahaing hasem bad ki kur ki kha kiba la wan synran shwa ban leit ontep ïa ka met ba dang sah sha u Lum jingtep jong ka Balang Catholic uba don ha Mawiong, Shillong.
Ïa ka jinglehniam ha kane ka sngi, la pyndep da u Parish Priest jong ka St. Dominic Savio’s Church, Mawlai Parish u Rev. Fr. Telesphor Nonglang ryngkat ka jingsakhi lang jong ki Rangbah Balang bad ki paid riewngeit jong ka shnong Mawiong Umjapung.
Kum ban shu pynkynmaw biang hangne, ba u Bah Marshall u la duhei ïa la ka jong ka jingim ha ka jingtwa ka synrum jaboh ha marten ha ka step jong ka 3 tarik u Rymphang, 2024. Ïa ka met jong u Bah Marshall la lap hadien lai sngi, kata, ha ka sngi Baar ha ka por kumba 4:00 baje janmiet da ka kynhun State Disaster Response Force jong ka Home Guards and Civil Defence da ka jingtrei shitom lang bad ki nongtrei jong ka Shillong Municipal Board (SMB).
Na ka liang jong ka Shillong Munipal Board ka la ai jingïarap da ka synduk metïap na ka bynta u Bah Marshall sha ka ing ka sem jong ka Kong Darisha Lyngdoh Mawphlang kaba la duhnoh ïa u kurim uba long u rishot jong ka ing ka sem.
